ABATE ANTONIO MARTINO

La difesa della scorreggia

Quand’autru canta guerri e capitani,
o pisi chi ndi ficca Sella e Lanza
amuri, o sdegni, o casi supraumani,
la Musa mia difendi (cu crianza)
lu piditu chi fannu li cristiani.
E cu ragiuni: tutti avimu panza;
Ognunu mbivi l’acqua e mangia pani
e l’aria si sviluppa in abbondanza:
per cui, s’è necessariu lu cacari
è necessariu cchiù lu piditari.
Eppuru si cuntrasta sta ragiuni
medianti l’affettatu Galateu
scrittu avanteri di li saccentuni
mu fannu tortu all’ordini di Ddeu
chi dissi: “Mangia e mbivi, sii patruni,
pidita, caca, piscia bellu meu”. 
E Adamu spurvarandu lu trumbuni
tirau nu piditazzu e non fu reu
e li premuna soi si dilataru.
Eva isa l'anca e rumba di lu faru.


Lu piditu, lu ghasmu e lu sternutu
su tri fratelli schietti ed innocenti:
si dui su currisposti cu "salutu" 
lu piditu pecchì mo di la genti 
va cundannatu comu prostitutu
e si rispundi "minchia" nchi si senti? 
Rispundi Gatateu chi si saputu, 
presentumi ragiuni e documenti...
Lu tonu di lu piditu anzituttu
la Musica lu situa a Fa Fauttu.
Scusati o di la Caso Monsignuri...
vui siti in curpa di tricentu mali.
Lu piditu pe vui perdiu l'onuri 
dovutu comu ad attu naturali; 
pe vui succedi colichi e doluri 
di stomacu, di rini e celebrali, 
murroidi, terzani e tanti curi
chi fannu ricchi Medici e Speziali...
Diri o lu culu: "via non piditari"
vali tu stessu "prena non figghiari"!
Si grazie a lu Statutu di lu Regnu
godimu libertà ndividuali
e ne’ pe stampa e lingua nc'è ritegnu;
lu nostru Signor Culu liberali,
pecchi non po spegari lu sò ngegnu,
giacchè la leggi guarda a tutti uguali?...


Canonici, in privatu ed in cunvegnu
rumbati puru ntra la Cattedrali,
ca nudhu sbirru cchiù veni e v’inqueta
servatis servandis di Teta.
Ed a la barva di la suppressioni
pe cui li chiesi e vui siti spogghiati,
cantandu missa, officiu ed orazioni
lu supra cu lu sutta vui accordati:
e si di ciò voliti na lezioni,
li Musici di Maiu avvicinati,
sì, sì, rumbati e senza suggizioni!
Lenzola e cazunetti non pensati
ca nc’è sapuni, cinnari e jhumara,
mu mpreca quantu pò la lavandara.
Ma de arte piditandi nu trattatu
mo nci vorria cumpostu a manu a manu.
Eu non ci arrescia debuli e malatu:
vi mandu dhià D. Roccu Gariglianu
chi pe stu ramu sta tantu versatu
chi merita lu postu di decanu.
Però sulu vi avissi cunsigghiatu
pe lu decoru di lu deretanu, 
a stornu di l'auguri lordi e brutti
diciti  piditandu, "Mu ti f…".
Chist’è lu Galateu di la Natura
chi usaru li Patriarchi anticamenti
l'odiernu è na nojusa affettatura
di bellimbusti giuvani succenti.