Ritorna alla pagina principale Ritorna alla scelta delle poesie
‘NA BELLA MIDICINA
Nu vecchiarellu, bellu utre e vinu,
cadiu malatu, e de nu funn'e lettu,
tri midici chjamau allu soi sinu,
ppe sse fa di' de illi lu virdettu.
Unu cce dicia ch'è de criscimugnu,
na cos'e nente, e 'ntra nu nente passa,
si sulu ha nu pocu 'e rijmugnu
e ppe nu mise la buttiglia lassa.
N'atru cce dicia c'un è cose 'e morte,
E’ nnu murbillu, o sta ppe fa nu dente,
ma ha de esse' ppe nu mise forte
e vin'un ha de vivere de nente.
Lu terzu, ppe nud' essere de menu,
cce dicia ch'è na cosa propiu fissa,
però de uatte cci nne vò nu trenu
e vinu quantu basta ppe na missa.
Lu vecchiarellu s'aza de lu lettu
acchjappa li tri dotti in midicina
ti l'avvicina allu parapettu
e tutti quant'e sutta tille mina.
Quannu chistu se sa ppe tutt'e vie
nu medichicchju ch'era vurpa fina
va duv''u vecchju e cce dicia: ppe mie
si vò guari' è segui' sta ricettina
appena chi te azi la matina,
a mente frisca e panza svacantata,
de vinu tinne vivere na tina
ccu quattru o cinque reste ‘e suppressata;
a minziurnu po' t'hade vivire
nu fiaschellu chjnu chjn'e vinu
veru Savutu e 'nsieme t'è arrustire
na panzarella ccu lle lign'e pinu
a sira ppe'te tene' cchju leggeru
na buttigliella de nu vinu chjaru
t'hade sculare tutta 'nteru 'nteru
senza c'allu prisuttu sie avaru
po dintr'u jurnu, puru cuntraura
nu biccherellu 'e nu vinu rubinu
t'hade jietta’ ppe ne fa ji’ st'arsura
e dicia tu chi c’è de cchjù divinu
Si tutt'a vita segui' sti cunsigli
st'a sent'a mmie ca campi dui centanni
senza na freve e senza chi te pigli
remu, maua saute o atri affanni
U vecchjarellu s'aza rinfrancatu
scinna allu vasciu piglia llu catinu
vadi alla vutta c' hadi scuverchiatu
caua llu catu 'e Ilu uinchja de vinu
e tuttu de nu iatu si lu tumma.
Po'se stuja llu mussu, vadi fore
e a tutti quanti grida ccu la trumma
ca stu primariu è propriu n'om'e core
e sa capire tutte ‘e malatie
e ppe d'ognuna tena l'acqua santa
ca puru ca tu si ppe chille vie
ccu chilla scenza soi, ed edi tanta
Te minta mpedi, te guariscia 'n fretta
ccu chilla beneditta sua ricetta
ch'è nnu vuccune duce nu purtentu
e llu malatu sana e fa cuntentu.