Al Papa é rivó a Costauta fora dal bosco, du ple vare co i so omin de scorta. É sozdù: dente era pi pras fora, chi a restlà, chi a sié: erba auta, é picé strapazà! Un ch avee pöna fnù da bat la fauze dà d vöio a nasché che n dea e dis a la so rodlarössa: "Spia ntin classù-va, spia che na sgozia ch vögn du ple vare, n vöde che figur porche-tu, n sa miga-lör ch i fa un desastro dle erbe! Che na raza de dente!... Da gno gnirai-po?"
Intanto sta porzesion foresta gnee senpro pi in dù, se vizinée senpro dapì.
"Porco csi, vöi ca, vöi ca sti porche csì...(apò ncamò) spia ntin che nasché bul-va, ne n à paura nanche dla fauze, spia che beches-va!"
Intanto ch al maledii, sta porzesion é riveda proprio par danti-su e un de sti bule se destaca, vögn arente... (tua n tin masa...) e con tröi döide pr aria... na os grossa...
"Sia lodato Gesù Cristo".
Cösto cardee da tma du ilò, cardee da zavarié in pes! Ch l à fato gni in sé é stada la rodlarössa, cuön ch l à moló la forcia e à tiró un bagaro: "Iné al Papa! Inpianta là duto ch iné al Papa, propio cöl da Roma, indoniöite du e bussa l anel".
"Oh, porco csi, é propio li, li in parsona!"
D intorno, daparduto, dut un bagaramöinto:
"Al Papa! Al Papa! É rivó al Papa du par Stamsöto!"
Dit e fato, duta la dente d Costauta ingrumeda intorno a sto Papa, na porzesion dle nostre du dla gedia, un tin dinze n tin d fora, duce a sintì l Papa a prediché.
Robe dl autro mondo, al Papa a Costauta!