PRESENTAZION

Zun pöis pizal e foravia com Costauta iné tgnu in bona considerazion al valor dla cultura, ch se mostra co l atacamöinto al dialetto ladin, a le tradiziogn, ma anche a l arte, a la musica, al teatro.

Se generaziogn d canai, gnude grögn, inà continuó a studié, lede e scrive, cösto iné anche tanto merito di maestres ch inà insignó zal secul pasó zle scole elementar, una dle prime cede de crode, fata su aposta par ese al palazo dal savöi.

Su la copertina de sto libro d poesii d Silvio di Stadvane iné stada btuda na fotografia dla scultura tacada su pla ceda di Botire, ch l artista Angelo Bettoni à volù dediché al maestro Osvaldo De Bernardin Stadoan Botiro (1838-1913), ch à insignó zal mile e otzento ai canai d medo al pöis, zla so stua col fonestre a maddì e a söra.

Ma compagn d li e dopo d li chietre maestres à savù böte dinze di cios di canai, ch é pasade ple stanze e sentade sui banches dle scole sul Col d Borcia, la tecnica dal lede, dal scrive e dal föi i conte, e picsöia l amor e la curiosité da inparà. Un d cöse iné stó Silvio, ch'inà vivù pöco ma inà lasó un bon ricordo dal so modo da föi scola.

Sto libruto d poesii, ch vögn publicó a cuaranta ane da cuön ch l é morto, iné la dimostrazion ch li era un on d cultura, ch inavee na grön sensibilité e bravura zal scrive par taliön, ma vö ese anche un riconosimöinto a duce i maestres ch inà insignó e insögna ncamò zle scole d Costauta. Par sti omin e ste fömne ch inà pasó la vita primo a inparà par sé e dopo a insigné a chietre, duce dovaraa provà gratitudin.

Lede un libro d poesii forse iné na roba pi difizil sno ch ciapà inze un romanso o na storia scrita in prosa. Ma verde ste pagine e cetà dinze al mondo d Silvio, pizal e grön insieme, iné come tornà a scola da li, par capì senpro algo d novo.

Comelgo, insuda 2005

Grupo musical d Costatuta