Collegamento alla pagina "Cadore-Comelico" de "Il Gazzettino"

19-11-2006

Al spetacul "Comelincanto" in Svizra

Al spetacul "Comelincanto" gnarà portó in Svizra sabo prosmo dai tröi grupe comeliane ch lo à btu in pes nasché ane fa. A invitöi zal cianton d San Gal iné stó al comitato taliön dla zité da Frauenfled, gno chi né dinze anche nascuance emigrede dal Comelgo zi ane Zincuanta dal secul passó. Al fin de stmana in tera svizrana sarà l ocasion par föi conosse ai tance taliane de cal cianton ntin d cultura ladina dal Comelgo e par föi rivive ai comeliane emigrede zal foresto el robe bele dla so tera. Infate al spetacul "Comelincanto", chi né stó fato in provinzia e in giro pl Italia bel pi de trenta ote, iné un bel mesdoz de fotografii dal Grupo Obiettivo Luce, balade di Légar, ciantade dal Grupo d Costauta, co l aparizion su la sena dle dói mascre pi bele dal carnaval dal Comelgo, al matazin e la matazina.
Zal spetacul "Comelincanto" vögn contada la storia vivuda dal popul de sta val aped la so tera, passön in medo a le stagion dl ön, ch iné l esenpio dal dì inante dal tenpo anche zal raporto intrà l on e la val. Dopo l insuda dl inamoramöinto e l istede dal crösse e fiorì, à tacó l otono e cösta stagion, chi né cöla ch son dòi a vive al dì d incöi, inà scminzió propio col caminé dla dente zi ane dl emigrazion dopo dla seconda guera mondial. La Svizra e la Franza inante e la Germania dopo iné stade i state gno ch la nostra dente iné duda a carì laoro e condiziogn d vita ntin pi sigure d cölie ch inclota al Comelgo podee ofrì. I comeliane s é fate conosse come brava dente d laoro, inà btu vi sode e mandó a ceda a mantgnì el famöi e föi su cede grande. I so fis iné nassude e carsude in Svizra e ntin a l ota desmöintia el liadure ch i à aped la so tera. I pöide di so veces se desvöita senpro dapì e fa malinconia a vöde dute ste cedone coi scure sarade, ch se verde snoma calche stmana a l ön, cuön ch torna i paesane emigrede. Somöia propio che sta stagion dl otono vada verso l ultmo tenpo di nos pöra poide, gno ch i bosches, come ch dis el parole de "Comelincanto", "ne sararà inze zl inverno dal nos mal stà".
Lucio Eicher Clere


   Pagina
"ACCADE A COSTALTA..."

HOME PAGE DEL SITO