15-10-2006

COSTAUTA

COMELGO - La dornada de studio sul cede d lögn, voluta da CostaltArte, inà otgnù un bon gradimöinto da i tance chi né passade sabo 7 d otobre zla sala dla Regola d Costauta. Al titul dal convögno inera stó tiró fora da na carta scrita dai funzionarie dal Catasto todösco, riferida a la situazion di pöide dal Cadore zi prime ane dal 1800: "pöce cede d muro, la pi grön parte iné d lögn". Na spieda largia, fata da profesores d université, a dute el maniöre da föi su cede zla storia di popui ch iné dude a stà su ple monte e zle valade foravia.
Na architettura poröta, fata picsöia coi materiai ch gnee fora dai poste, lögn gno ch era tance bosches, crode, gno ch era cave de cröpe. A scotà Santino Langé e Paolo Bossi, profesores dal Politecnico d Milön, Davor Salopek dl université d Zagabria in Croazia, Luigi De Matteis e Michela Mirici Cappa, espertes d edilizia popolar zun dute li Alpi, iné rivede a Costauta tecnici, passionade dl argomöinto, dente curioda da scotà robe contade da chi ch sa dapì.

Intrà la dente granda iné rivede anche i canai dle scole medie d Sa Stefin, conpagnede dai so profesores. Na presenza gheta e atenta a cöl ch gnee dito, picsöia el fotografii mostrade sul schermo grön. I canai inà siguro inparó algo d novo, ch i servirà par continué a conosse dapì la tera gno ch i vive. El relaziogn pi liede a la val né stade cölie de Alberto Peratoner, ch inà parló dle cede d Sapada e de Viviana Ferrario, ch inà contó su pal canbiamöinto dla costruzion dle cede a mité dal 1800, cuön ch inà tacó la nova maniöra da föi su cede, no pi co i trave d lögn ma co le crode.

A Costauta , come a Sapada, iné restade ncamò un bon numar d cede d lögn e alora s dovaraa föi duce i sforzes par mantgnì sto patrimonio, söia in favor di parogn dle cede, söia anche dle ministraziogn publiche ch podaraa valoriselie pla dente dal posto ma anche par cöi ch vögn da fora. Ma se da Sapada iné gnude a scotà al convögno al sindaco a al presidente dla comunità montana, dal comun d San Piöro, ch inà zal so teritorio al pöis d Costauta , n s é presentade nsun, ne sindaco, ne asesores, ne consiliöre, nanche un inpiegato o un stradin.

E ne n à fato na bela figura dante a la dente d Costauta , ch inà capù n ota dapì cuanto pöco che sti ministratores tögna al "pöis d lögn". Chi ch à fato bela figura invece iné stade i frades De Bettin, dla Dba Grup, ch inà sostgnù con un contributo l organisazion dal convögno.
Lucio Eicher Clere