11-6-2006

COMELGO - Nane d Linc inà fnu da pituré e da scrive par ladin.
Ma cöl ch l à lasó zun zincuanta ane d ativité dal pnel e dla pöna, lo fa ricordà come un grön personagio dla Ladinia de Blun. Li iné stó un di prime a còi su e ingrumé proverbie, möde da dì, fin dai ane Sesanta dal secul pasó.
Ne n à mai pensó da böte insieme un vocabolario, anche s ni saraa manceda la conosenza d tante parole vece e dle maniöre come ch el gnee dorade zal parlà dla dente, parcheche li avee al stinto dl on libar, co la tendenza a creà e tol dù zal tenpo breve, come ch al fadee par i so cuadre. E infate li inà dó al möio d se come scritor ladin, cuön ch al s é btu a scrive poesii e storie in prosa.
Roba scarzola, come "Iné rivó l orghin a Costauta" o "Epur s é ncamò vive", ma anche inpegneda, come "Iutonse s podon" o "Al capitel di Variste". El robe pi inportante iné stade publichede zun tröi libre: "I Nvizes", traduzion dal romanso "I Promessi Sposi" d Alessandro Manzoni, "N Ota inera", ricorde di ane dla dovantù e dal pöis d n ota", "Pinochio ladin", traduzion de "Le avventure di Pinocchio" de Carlo Collodi. Snoma de sto ultmo libro, scrito e publicó zal 2002, a vinte ane da i Nvizes, iné ncamò a disposizion nascuante copie. Chietre dòi inveze iné fnide, se spöra btude via in giro ple cede dal Comelgo e d tance pasionade dal ladin.
Nane d Linc iné stó un maestro zal böte par scrito la parlata viva e legra dal ladin comeliön. I descorse fate intrà d Agnese e Parpetua, o intrà don Abondio e Renzo, ma anche el descriziogn dla storia tramudeda dal taliön d Manzoni al ladin d Costauta iné algo d gustos a lede, ogni ota che capita da verde i Nvizes.E csi el ciacarade intrà el parsone fate gni fora dai ricorde dla so dovantù. Iné stó polito che zal frontà dòi libre dla leteratura taliana l ebia tlosto par mön Manzoni e Collodi, dòi grögn ch inà savù dorà la lönga popolar ch s é adata anche al lönghe pizle, come al ladin.

Fin in ultmo li inà tgnu auto al valor dla scritura, e didee a chi ch i era arente da scrive par li, dato ch i sö vöi vdee pöco e i avee robó la comunicazion pi natural coi colores i i sögns.
Al so ricordo restarà vivo par etre generaziogn, e tance podarà dì a carì la so anma dinze dle piture e di scrite.

Lucio Eicher Clere