26-3-2006

Al spetacul "Comelincanto"

Al spetacul "Comelincanto" iné stó btu zun disco DVD e podarà ese spió sul televisiogn d ceda. Al laoro, che stadee sora ció da n pezo a i tröi grupe, Obiettivo Luce, Légar, Grupo musical d Costauta, ch inà fato sta rapresentazion, iné stó fnu sti dis pasade e la prima ocasion par ofrilo al publico iné stada a Mira d Venezia, gno che "Comelincanto" iné stó presentó vendre söra zal teatro dla zitadina in riva al Brenta. Al disco inà dinze duce i momöinte dal spetacul, anche se strandude in manco tenpo, par föi capì duto al mesagio ma zenza stufé, visto che na roba iné dì a teatro e un autra spié la television, gno ch ormai duce iné abituede a vöde li imagini a pasà corögn una dòi l autra. Al laoro da inbastì duce i elemöinte dal spetacul iné stó fato da Federico Janese da San Colò, un dogn pasionó dla telecamera e dal conpiuter, ch à savù lié el fotografii dal grupo Obbiettivo Luce apede el balade di Légar, el musiche, el ciantade dal grupo d Costauta, con böi efete e na mön lediöra.
Iné tance zal val dal Comelgo, ma anche foravia, ch inà domandó da podöi avöi na registrazion dal spetacul "Comelincanto" e da ca inante podarà cetà sto DVD domandön ai amighe di tröi grupe ch lo presenta. Na registrazion d vinte minute iné anche na bela presentazion dla val ladina dal Comelgo, par föila conose dapì a chi ch volösa gni casù a pasà nasché dis in vacanza.
Al spetacul "Comelincanto" zle ultme dói ocasiogn d Torino, gno ch l é stó fato zla sede dal Gruppo Abele, e d Mira, zal pi bel teatro dla Riviera del Brenta, iné stó aprezó da duce.
Lucio Eicher Clere