4-10-2002

PLATA DI LADINS

L museo d Padla

Vita d n ota in Comelgo
di Pinter Vangelista

S é sarada na bona stagion d istede pal museo d Padla in Comelgo d Sora, ncamò n ota piöna de dente pasada dinze dla sofita dla scola vecia, gno ch'iné pi de 500 metre cuadrate de spazio dedicó a la vita d n ota in Comelgo. Sodisfazion picsöia pal creator de sto museo, Vangelista De Martin Pinter.
Li inà tlost su l impögno da böte in pes sto spazio ple robe d n ota cuön ch'l era ministrador dla Regola d Padla, ma dopo inà btù là l anma e l cöre par föi su duce i cuaröi d sofita gno ch'iné btude fora li arte e gno ch' se mostra i löghe dla vita di nos veces. "Sto museo -dis Vangelista a cöi ch'va là a spié- é stó fato par capì la vita di nos veces, come ch'i é stade bogn da mantgnì la so roba, el so arte e picsöia i so valores d vita, pur zla fadia, zla miseria, zi patimöinte.
Al museo d Padla iné fato compagn d tance etre spazie dla memoria dna valada, cöi ch'par taliön vögn ciamade "etnografici", e inà dinze la ricostruzion del cede d n ota, con dute el stanze come che li era; inà dute li arte da laoro dla tera, söia d fora ch'dedinze zi tabies e zle stale; li arte di mistiöre pi de braura, come al marangon, al pintar, al fauro, al sartor, e ncamò etre.
Etre cuaröi dla sofita iné dedichede ai tempe dla guera granda, ch'anche in Comelgo inà fat vöde al so matio grön, sui confine del monte dal Popera e dlongo via ple cröste dla Spina, dal Palombin e d Visdende.

Na bela stanza iné cöla col casele d Berto d Linc' da Costauta, gno che sto marangon co la vöna dl artista e co la voia da lasà al ricordo ai canai di tempe d n ota, inà fato in pizal, duto d lögn, i ambientes e li arte ch'doraa i nos veces.

Arente iné un autra stanza d robe pizle, fate da Gilberto De Martin Pinter, picsöia ceres tirede da ciavai, ch'mostra al laoro zal bosco, zi prades, a verde nöio d inverno.

Al museo d Padla iné lo spazio pi grön dle robe di veces in Comelgo, ma ne n é l unico. Etre spazie dla memoria iné a S-ciamazögn, a Dodlöi, a Costauta e etre ncamò nasarà zi prosme ane.

Lucio Eicher Clere