15-7-2003

PLATA DI LADINS

Istede culturala
Pla valada dal Comelgo
a Costauta dal 20 al 27

COMELGO. Una dla pi bele e ormai inviede iné cöla ch'se farà a Costauta zla stmana dal 20 al 27 d luio e che s ciama "Na statua d lögn, zna ceda d lögn, zun pöis d lögn".
Par duta la stmana tröi scultores scolpirà arente una dle vece cede d lögn, che ze sto pöis iné ncamo pi de trenta, par portà inante al progeto dl asociazion CostaltArte, ch'vö böta aùna apede ogni ceda d lögn na scultura d lögn. Oramai, con stòta, el cede fornide de sculture iné dodes e dà bel mödo da vöde na pizla galaria de opere d arte de brai scultores su lögn. Stòta i tröi artiste sarà Albert Crazzolara dla Val Badia, Silvano Ferretti dla Val d Aosta e Franco Vergerio da Lentiai. Ogni söra gnarà fata na manifestazion d musica o d teatro par biné arte e spetacul. In ció dla stmana i scultore gnarà premiede col "Premio Beta Fabiana", btu a disposizion d CostaltArte dal imprenditor Mario De Villa Palù.
In agosto ogni pöis dla valada presenta algo d riferù a la cultura ladina, dai musei, al mostre d pitura, al feste paesane. Gnarà verte, presempio, i musei d Padla, de Sciamazen, d Costauta. Ma la manifestazion pi bögn imbastida sarà cöla fata a Dudlè zi dis 9 e 10 agosto, organiseda dal grupo d rizerche culturai. Gnarà ciamade anche cialò nascuance scultores sul lögn par scolpì i vòltes da carnaval, che proprio zal pöis de Dudlè inà la tradizion pi viva, cöla dla mascrada d Santa Plonia. Liòre fate in chi dis gnarà btude fora dle bande d un tröi ch'parte da pöi e va fora pla campagna e csi restarà in vista par duce cöi che caminarà da cla banda. Zla söra dal 9 gnarà presentó pla primaòta al spetacul "Comelincanto", fato d musiche, balade e imagini dla val ladina dal Comelgo. A föi sto spetacul inà btu al so impögno al grupo "Obbiettivo Luce", al grupo di "Legar", al grupo d "Costauta". S'è pensó a na storia, gno ch'al filo iné tgnu da la mascra pi vöra dla tradizion, al matazin. Inà sostgnù la realisazion de sto spetacul l Union ladina dal Comelgo, la Comunité montana e la Provinzia de Blun.

Lucio Eicher Clere