Tiu Liberau Curreli in s'annu 1881, fiat su Priore de sa festa de Santu
Micheli Arcangnelu de Aritzo. Sa die innantis de sa festa, Tiu Liberau bandat
a sa Parrocchia cun sa pobidda, tia Marinnassia Manca, po mudare su Santu.
Hanta portau medas arramallettes de frores, pius de una duxina, e unu coffinu
prenu galu de seda de diversos colores: biancos, color 'e aera, muscaos,
albios, bildes e tanaos. -
Balla! Deo e Marinnassia d'aus mudaus aberu a santu Micheli Alcangelu: non
sind'hanta erriere no ... hant'a brigare puru, naro eo! ... Cummenzant'
affrochillare su Santu de arramallettes, de galos e de giunchillas..
beniminde! ...
Nd'haus comperau meda de galo, o Liberau - a' nau Tia Marinnassia - e ne
sobrat meda ... Ite fiaus enzand'oro? ...
No m'impoltat nudda, s'ispesa como est sciatta, e abbarrat fatta! ... Deo a
domo non ce ddos polto prul no ... Mi narat s'idea de mudare sa coa a su
Tiaulu puru, it'issu puru no ddu meritat? E no est in Cresia? E non ddu
croccant puru? ... Issu puru olet s'onore no! e si bene no m'hat fattu, male
puru no ... A su mancu bragat issu puru, e is cumpagnos arrenegant... Ite
nde naras Marinnassia? .....
Deo naro ca este un'idea macca sa tua, e it'est scinze peccau! ... - Bae ca
no est peccau no ... Lassa faer a mimi e calladi tue! .... Appena ci hada
cuncoldau su frocu a sa coa de su Tiaulu, si dd'hat castiau ene ... e addu
hies .. ca non paret pius'issu no ..
Muda muda fruccone, pares unu barone, narat su diciu ...
S'ind'andant a domo allilgos e cuntentos Su crasa a notte tiu Liberau had
biu in su sonnu su Tiaulu e di narat:
- Castia... s'onore chi m'has fattu tue irisero non mi dd'appo a iscaresce
mai, no mi dd'hat fattu mai nessunu. De tott'is Priores chi nci sunti
istetius, de s'antighidade a oe, nessunu hat tentu mai s'idea tua. M'hanta
disprezzau sempre, mentres tue m'has calculau. M'has postu unu frocu uguale
a santu Micheli... Deo po gratitudine ti depo donare unu premiu ca ti du
meritas! ... Beni cun me a unu logu chi ti naro eo e has'a biri! ...
Bandant'in pare (sempre in su sonnu gi si cumprendit) e du portat a sa
punta de unu monte. Cand'arribant a unu zertu trettu di narat:
Giust'innoe, castia bene ... mi... iscava cun d'unu marrone e a profundidade
de unu pram'e mesu ,pagu prusu, has'a incontrare unu iscusorgiu ; unu schiu
chi pigat una quarra, tottu prenu de marengos... Castiadi a donnia parte e
osserva bene su logu, no isbaglis no ... cust'esti su puntu prezisu, a unde
depes marrare ...
Tott'in d'una su Tiaulu est'iscumpartu, e du lassat solu... Issu si castiat
bene su logu po andare su crasa, ma non biet nessuna cosa chi serbat de
signale in cussu trettu, ne perda, ne fostigu, ne erba e ne prantone; no
isciat comente faere... E pensat in sei 'e tottu:
comente mi pozzo arregulare eo! ...: no du hat nessunu signale innoxe ...
Bisognu chi fazza in custu modu: mi nde calo is calzones e mi pogno a cagare
innoxe ... cussu m'hat'a selbire po signale ...
Faede ... e tottind'una intendet sa oxe ispramada de tia Marinnassia:
It'est su chi m'has sciattu? ... molente ci no ses'atteru! A ti cagare in su
lettu! ...It'est custu crisu e i custu fragu? ... m'has cagau tottu su
fiancu. Polto su costau prenu 'e melda, polto! .. -
Eh! Anca fiat su signal'e s'ischisolgiu!.. Su Tiaulu ci dd'hat nasciu!
Mentres had'alluttu sa candela, e tia Marinnassia si nde pesat po s'illimpiare
de tottu sa bruttesa ci portada, ca nde fiat prena finz'a pabaristas (e sa
carriga fiat manna, massimu in prangiu de Priorissau), su pobiddu di narat
tottu su sonnu chi hat fattu!..
Ah! Tenia arrexone eo!.. Ca su ci has sciattu a su Tiaulu si dd'hat pigau a
su malu coment'e un'ispezi'e beffa, e t'hat torrau s'arrevesa! .. Comente no
est saccaxiu onu 'e tottu! ... E calladi como: is iscusolgios a prima si
furrianta in crabone, como si furrianta in melda!!! ... - Ci ti zacchet in
cara! - hat'arrespostu tia Marinnassia.
In breve : una storiella appartenente alla raccolta di
Signor Molle