VOCE ANTICHE
:::::::::::::::::::::::

(canzone)
 

dalla raccolta poetica

Kimerik 2005
 

'A canzone è de Napule 'a riggina

e, dint''a storia 'e Napule, 'a canzone

ha fatto suna' 'e moglie cuncertine,

nu surriso ha rialato a ogne balcone...

Ferrimene scicche e uòmmene alicante,

zandraglie 'e Vascio Puorto o 'a Ferrovia

sanno 'e stessi mutive tutte quante

e 'e cantano cu' 'a stessa simpatia!...

Chisà addò stanno chelli vvoce antiche

d''e tiempe 'e Giulio Cesare Cortese...

Quanno 'e vajasse, cantanno dint''e viche,

facevano 'e dispiette a li francese!

E cu' Basile e cu' Velardeniello

cantava Micco Passero all'amata

"Lo Cunto de li Cunte" e 'o riturnello

'o faceva nu calascione 'nnammurato...

Cantava Sgruttendio "Tiorba a Taccone"

e Valentino sunava "'A meza canna"...

A Ciommo ca sunava 'o calascione

Pagano "La Fenizia" jeva cantanno...

Doppo venette Giulio Genoino

ca cu' "Li 'Nferte" passava a rassegna

tutt''e fatte luntane e vicine:

Fatte ca a ll'èbbreca lasciavano nu segno!

Infine po' venette nu Cantore...

Di Giacomo...'o cchiù napulitano,

chillo ca firmaje 1'èbbreca d'oro

cu' "San Francisco" e "'O Mese Mariano"!

E, appriesso a isso, ce venette ancora

Chiurazzi, Russo, Murolo e Galdieri,

e a ssenti' 'sti mutive, pare allora,

se scetano 'e ricorde 'int''o penziero...

Cante cantate all'angulo d''e vvie,

dint ' ' e paranze stese 'mmiez''o mare,

canzone fatte 'e ciente puisie

ca 'a vita facevano cchiù cara...

Ma forse è meglio ca 'stu libbre 'o 'nchiudo!

Che me 'mbriaco a ffa' cu' 'sti ccanzone?

Sunna' a che vale, si cu''o core scuro

chest' anema ha da perdere 'a raggiona?!

'A notte scenne 'int'a 'sta stanzulella

ed io... m'addormo cu' 'stu libbre 'nzino...

'Ncapa sento 'e mutive 'e Pascariello.. .

'ncore 'e suspire ardente 'e Carulina...

E, mentre sonno 'o tiempo ca nun torna,

me scota 'o primmo raggio d''a matina..

Giesù! Comme s'è fatto ambresso juorno!

Sento luntana 'na vucella fina

ca canta allera areto a 'na fenesta...

Nu garuòfeno schioppa 'int'a 'na testa!

S'è fatto juorno!...Addio, malincunia!...