Vittorio Aprea

SERENATA SMARGIASSA
:::::::::::::::::::::::

 

(Canzone)

 

dalla raccolta poetica

Kimerik 2005
 

Fronna d'aruta...

'a femmena cchiù 'nfama se n'è ghiuta!

Fronna d'amenta...

'sta serenata 'a pozzo fa' contento!

Fronna, frunnella...

pure si sto 'nzerrato 'inf'e cancelle!

 

                     1

'Na serenata mmiez''e rrose,

sott'a nu pergulato rampicante,

'n'arietta fina e addurosa

p''o sfizzio 'e nu surriso palpitante...

E tu ride, Carme',

ride e me sfutte,

mentr'io te canto 'sta canzona doce!

E nun te 'inporta 'e me:

'st'ommo distrutto

ogne minuto 'o 'nchiuove 'nfaccia 'a Croce!

 

                       2

'Nn'aggiu vuluto sèntere

'e cunziglie d'amice e d' 'e pariente

e aggiu vuluto spènnere

'e sentimente miei p' 'e ccose 'e niente!

E cosa 'e niente si',

femmena amara,

femmena bella, ma troppo traditora!

Ma si me stanco io

piglio e tè sparo!...

E dongo pace a chistu scemo 'e core!

 

                            3

'Nfame, io t'aggia accìdere!

E addenucchiato annanze a tè, ca muore,

senza cchiù vederte ridere

cu' 'e llagreme ca m'affocano 'stu core

io t'aggia di', Carme',

mentre te stute,

ca tu pe’ mme si' stato 'o vero ammore!

Pirciò, siènteme a mme,

chesta ca he avuta

è ll'ùrdema serenata 'e chistu core!

 

Fronna d'aruta...

'a femmena cchiù 'nfame se n'è ghiuta!

Fronna d'amenta...

'sta serenata 'a pozzo fa' cuntento!

Frorma, frunnella...

pure si sto 'nzerrato 'int' 'e cancelle!








 

Home

.:: Email ::.


Webset  by © KissDesign Website