‘N’OMBRA

 :::::::::::::::::::::::

 Gaetano Esposito

Ritratto di Donna che ricama

 :::::::::::::::::::::::

Stanotte, verzo ‘ ddoje, stevo liggènno

nu canto de “L’Agnano Zeffunnato”,

scritto da certo Andrea Perrucci,

poeta d’’o seicento illuminato.

Chelli sestine, napulitane antiche,

me dèveno nu senzo ca nun dico…

All’intrasatto, dint’a ‘stu studio mio

vedette ‘n’Ombra a n’angulo assettata,

‘mmano scurreva ‘e grane ‘e nu Rosario

e ‘a faccia era chella ‘e ‘na pupata…

Cu’ nu miezo surriso ammaliatore

me facette zumpa’ ‘mpietto chistu core!

Ricanuscetti sùbbeto chell’Ombra:

era chella ‘e Mamma mia carnale…

E chillu surrisetto spirciacore

me parette ‘e sanarme d’ogne male;

io Lle parlaje, mentr’Essa steva muta:

“Mamma mia bella, addò te ne si’ ghiuta?

T’aggiu cercata ‘int’’e ghiurnate ‘e sole,

t’aggiu chiammata ‘int’’e nuttate amare,

aggiu chiagnute lagreme cucente,

sulo, sperduto, senza pace trovare…”

Me rispunnette, strignènnome ‘na mano:

“Fòra fa freddo! Mièttete ‘a maglia ‘e lana!”