A Vittorio Aprea col quale ho condiviso stili di vita, interessi culturali,affetti, poesia.

 

Giulio Mendozza

 

MO PURE TU...

:::::::::::::::::::::::

 

Vitto', mo pure tu te ne si' ghiuto,

fronna caduta 'a 'st'albero 'nzecchito,

si' partuto, 'nzilenzio, zitto e muto

e j' che faccio, sempe cchiù stranito?

 

Stranito sì, pecché me scappa 'a mano

'a presenza 'e chi m'era cchiù carnale,

nu suono 'e voce sempe cchiù luntano

ca s' 'o porta nu viento 'e maistrale.

 

Sempe cchiù sulo, senza chill'affette

ca rignevano 'a vita 'e giuventù,

Alfredo, amico 'e core se ne jette  (*)

e mo m'hĕ 'bbandunato pure tu.

 

Quanno pure pe' me scurarrà notte,

amice mieie, venìteme a piglià',

venite a me levà' 'a miez' 'e botte

e 'st'uocchie stanche 'e chiudarrà mammà.

 

(*) Alfredo De Lucia, poeta, commediografo, amico.


 

Home

.::::.


Webset  by © KissDesign Website