DOPPO ‘O SISMA

:::::::::::::::::::::::

O nonno 'ntrattenenno sta 'o nepote

cercanno 'e fa' curaggio a 'stu guaglione,

ca, stupetiato, guarda a 'o vicchiacone

cu' ll’'uocchie 'e chianto e 'a faccia sporca 'e lota,

"Che ce ne fotte a nuje d''o terramoto?"

'o viecchio dice cu' 'na voce cupa.

"Guaglione mio, nononno cchiù 'e 'na vota

ha sentuto 'e tremma' 'sta terra e 'e lupe

dint'e campagne n ' hannu jettato strille!

'E juorno o 'e notte n'aggiu 'ntiso 'e bbelle!

Ma io, arravugliato dint'a chistu scialle,

sempe so' stato ccà, 'mmiez'a 'stu ballo!

E po'... pecche 'sta parola:"'O TERRAMOTO"

adda fa' vollere 'o sanghe a tutte quante?

'O terramoto è n’attimo sultanto,

è nu sussulto, nu poco d'arrevuoto...

Pirciò, siènteme bbuono, figliu mio,

tu guarda a me e fatte 'na resata

e, si siente 'n'ata tremmuliata,

nun ce penza'!...Ride! E fa fa' a Ddio!

Il sismo è una cosa naturala,

pecche 'a terra pur'essa tene 'a foja:

fa cumm'a tte, comme a 'sti mmane toje,

ca maje se stanno ferme...ed è normale!

Tu guarda sempe a mme: so' 'ndifferente...

e nun tengo paura maje 'e nisciuno:

pure si m'attaccassero cu' 'e ffune

io cantarrìa in qualsisia frangente!"

E, mentre 'o viecchio parlava cu' 'o guaglione,

se sentette na bòtta a 'o pavimento...

'O vicinato, dint'a nu mumento,

p''e scale se vuttaje e nu frastuono

se sentette p''e strade d''o Pennino!...

'O viecchio, intanto, cchiù nun pepetiava:

guardava 'o lampiero ch'abballava

e...'o guaglione s''o strigneva 'nzino...

E quanno se sentette n'ata bòtta,

'o piccerillo, stritto a 'o nonno 'nzino,

cu' 'e piede 'nfuse, chiammaje 'int''a cucina:

"'A No!!!...Nononno s'è pisciato sotto!!!"