CUNTRORA DIGIACOMIANA
:::::::::::::::::::::::

 

Saglie pe’ l’aria n’addore ‘e ciclamino

e tutt’attuorno è nu profumo ‘e sciure.

Canta ‘na figliulella p’’o ciardino…

Ae secùtano  ‘arille ‘ncopp’’e mmura…

P’’o vico ‘o sole spacca ‘e pummarole

spase pe’ copp’’e ttavule, a ffilera…

E ‘sti pummarulele stese a’o sole

pàreno tanti vvocche: ‘e cchiù cenére!

Nu munaciello saglie ‘sti scalelle

e se ferma ogne tanto a piglia’ sciato…

‘Nnant’a nu vascio nu giuvanuttiello

smicceja ‘na piccerella ‘mpont’a strada…

Chest’afa ‘e giugno trase dint’’e ccase

e fa spuglia’ ‘e coppie ‘int’a controra!

Benedetta l’està! Pure si ‘e vase

te costano sudate e apprietto ‘e core!

Cchiù nun se sente ‘o canto p’’o ciardino!

Ll’arille so’ scumparze ‘a copp’’e mmura!...

‘E vàsule so’ piezze d’oro fino!

Sempe chiù t’attanaglia ‘sta calura!

‘Int’’a controra mò se so’ addurmute

‘e ccase…’e ccose… e tutto s’è fermato!

Pare ca all’intrasatto mò è fernuto

ogne pàlpeto ‘e vita pe’ ‘sta strada!...

Ma ‘int’’o silenzio se sente ‘o ppoco ‘e voce

ca fa jetta’ su spire a tutto ‘o vico:

“Scètate, Carulì, ca l’aria è doce!”

“Voglio campa’ cu tte…muri’ cu’ ttico!”…