Bollezzumme! Coltùa
Bollezzumme!
Coltùa
|
Da-i "Campi Hobbit" a-i noglobal do G8 ghe n'é
stæto pe coscì, into passâ di anni, che se son provæ
à mette e moæn in sce J.R.R. Tolkien, à "tiâlo
pe-o giacchê", à arrollâlo d'ötoritæ sotta a
sò bandëa. Tentativi basæ in sce di attesti. O
scrïtô do "Segnô di Anelli" o no se fa
inquaddrâ inte caselle grixe da polìtica. O dïva de lê mæximo: "E mæ opinioin van sempre de ciù verso l'anarchìa (inteisa filosoficamente comme aboliçion de tutti i contròlli, no comme di òmmi barbassùi che tïa de bómboe), ò se donca verso unna monarchìa no constituçionale. Fermiæ tutti quelli che deuvia a pòula Stato (con intende ògni cösa ch'a no segge a tæra ingreise e quelli che ghe sta, comme dî quarcösa ch'a no gh'à nì de poei, nì de drïti, e nì de intelligensa); e dòppo aveighe dæto a poscibilitæ de tiâse in derrê, ô giustiçieiva s'o l'arrestesse da sò idea!" O no l'é un caxo se scinn-a o sò mondo imaginäio pâ ch'o se inspïe à sta régola. Inta Tæra de Mezo, o l'é un malemmo quello ch'o no se contenta di regalli reçevùi da Dio e o se ne veu accaparrâ di ätri; coscì, comme no ghe basta de goernâse da pe lê, o veu goernâ e ätre gente. O corolläio no scrïto o l'é che, con ciù unna personn-a se ghe leva o lìbeo arbitrio (ciù a ven goernâ), con ciù a se perde lê mæxima, ancon avanti che a sò libertæ. O Sauron o no gh'à d'in gïo di òmmi lìbei, ma söo che di servi; che, liätri ascì, en mai tanto corrompïi into spïto e inta morale, che no se peu manco conóscili un da l'ätro. O Saruman ascì, o strion cómprixe do Mâ, o cazze vìttima de l'intentaçion tìpica di re-filòsofi descrïti inta Repùbbrica de Platon: fòscia lê o veu o "ben de tutti" e ghe pâ che söo che o sò sæximo o pòsse procuâlo. I òmmi saian feliçi söo che quande quarchidun o ghe porrià construî unna colissa, quande in sce sta colissa o ghe mettià un treno e lô, belli ordenæ, piggian pòsto in sciô convöio pe obbidî tutti aggaibæ a-i òrdeni che ghe dà a cäa amosa e greive do Poei. Semmo de longo lì: quande l'utopia a ven realtæ, e colisse finìscian d'ëse d'öo, e se descreuve che i vagoin en foddræ de ciongio. Pe contra, un paise inta Tæra de Mezo o l'é tanto ciù lìbeo, quante meno o goerno o se intriga. A Contea di Hobbit a l'é unna naçion che goerno a no n'à, e che e sò quattro parte (i "Decumæn") son a-a dreitùa ligæ da un patto à uso fedeale. A-i tempi de 'nna vòtta, a Contea a l'ëa goernâ da un re, ch'o l'aiva a sò sede à Fornost (Roccanòrda): sede che, a-i tempi da Guæra de l'Anello, gh'arrestava söo che de muasse pinn-e de zerbo. D'ätra parte, no gh'é nisciun ch'o sente o beseugno ò a farta do goerno: "ògni famiggia a stava appreuvo a-i sò daffæ". E de de lì s'accapisce che a soçietæ, stæta lasciâ à inzegnâse da pe lê, a l'attreuva un òrdene e un balansamento spontanni. Unn-a de càreghe instituçionale che gh'é arrestòu a l'é quella de Conte, ch'a spëta a-a famiggia Took. O Conte o l'é o giùdiçe supremmo da Còrte de Giustiçia, o Prescidente de l'Assemblea Naçionale e o cappo de l'exerçito Hobbit, tutte instituçioin che ghe son söo che inti momenti de urgensa (che saieiva comme dî mai): o tìtolo de Conte o l'é ciù unn'onorificensa che unna càrega. L'ätro offiçio pùbbrico, ch'o continua avendoghe unna vëa fonsion, o l'é quello do Scìndico de Priabeuggiâ, càrega elettiva ch'a l'indùa sett'anni e a ven renuâ a-a Fëa De Badda in scî Gianchi Peuzi, quande gh'é a festa Lithe de Meza Stæ. O ròllo do Scìndico de Priabeuggiâ o l'é quello de stâ à cappo di disnæ da festa, e ascì stâ appreuvo a-i Servixi di Tragetta e da Guardia Naçionale (de fæto o l'é ascì Ministro de Pòste e Primmo Guardacontea). I Guardacontea ëan in sostansa a sola forsa de l'òrdene che ghe foïse; o sò ròllo o l'é offiçialmente quello de dâ a mente a-a seguessa personale di Hobbit, scibben "s'occupàvan ben ben de ciù de bestie che se perdeivan": fæto ch'o â dixe longa in sciô livello de delinquensa inta Contea. E de fæto ghe n'é söo che dozze, trei pe ògni Decuman, e a sò sola "montùa" a l'é unna ciumma in sciâ berretta. Ghe n'é quarche ätro, inte 'n nùmeo ch'o peu cangiâ, pe dâ mente a-e frontëe e no lasciâ che i foestê "dàggan breiga". L'é o caxo de nottâ che, quande a Contea a ven occupâ da-i òmmi de Sharkey e sto chì o ghe fa vai a sò "raçionalitæ" postissa (ch'a vive de vertadëi "piani quinquennali") a burocraçia a se mortìprica e l'òrdene spontannio o se deslengua inte'n grixo tutto pægio. O Tolkien, dappeu, o dixe ciæo che, e ùniche leze che gh'é, i Hobbit ê attribuìscian a-i tempi do re, e végnan respettæ in mainëa spontannia perché ê conscìdian "antighe e giuste". Ste leze chì - che l'é ciæo che tràssan un regime de common law, basòu in sce l'ötorevolessa ciù che in sce l'ötoritæ - doveivan in sciâ fin confirmâ quello che, con Murray N. Rothbard, ne saiæ cäo acciammâ "asciòma de no aggrescion": nisciun no gh'à o drïto de agivâ a personn-a, ò a röba di ätri. |