A-a stæ, ne-i Quartê in discorso, se vedde i caroggi pin de figgeu strassæ, brutti. Chi sensa braghette, e chi sensa camixa, e chi nùi a-a dreittùa; con cavelli che n'an mai visto de pëtene. Dònne oçiose in scê pòrte de ciassa e de butteghe à dî mâ da vexinn-a A e da vexinn-a B; ätre dònne à fâse pëtenâ vixin a-a buttega da besagnin-a, da fainòtta ò da leitæa; ätre dònne ancon in sà e in là à parlâ do semenäio, discorso prediletto de tutta a settemann-a. Òua lascio dî  à voiätri in che stato se dévan trovâ e case de queste tali, che poliscia ghe dev'ëse.
Ma o ciù che fa strenze o cheu son quelli figgeu che î allévan vagabondi. Pan pròprio figgi de nisciun! Tanti di sò parenti, di sò genitoî van à travaggiâ e î làscian pe-a stradda, tanti perché no se ne cùan, e tanti co-a scusa che a-e scheue infantili no gh'é de pòsto. A ve pâ questa unna scusa bastante pe lasciâli coscì abbrettio? Eppù tante vòtte ritornando à casa î trovæ inciagæ, perché se méttan tanti insemme, fórman de squaddre, e fra quartê e quartê se méttan à prionæ, caxonando incòmodo a-i çittadin e a-i foestê, i quæ, da l'ìndole do popolan, giùdican a çittæ. À l'inverno pòi o freido o fa diminuî i figgeu e e dònne de pe-e stradde. Però di figgeu se ne treuva in sà e in là pe-i pòrteghi à zugâ à carte. Coscì piccin ghe lasciæ piggiâ questo brutto viçio! Chi fa pietæ o l'é o stato de quelli che î làscian in casa soli. A-a stæ (me fäva giustamente osservâ un) con un pò de fruta ò ben ò mâ vìvan; à l'inverno invece an i brignoin a-e moæn e a-i pê; pin de freido, son sempre abbrensoïi, e tanti stan da-a mattin a-a seia sensa mangiâ de cädo. Pe de ciù, questi figgeu son serræ in casa, dovve da-a sporchiçia gh'é un tanfo da no poeighe resciste. E perché gh'é questa spussa? Perché poæ e moæ van via a-a mattin e tórnan a-a seia pe fâ da mangiâ e andâ sùbito à dormî. A-a casa ghe dan recatto a-a doménega. À questo mòddo o fìxico o ne sòffre inmensamente.
No tegnindo coscì in nisciun conto a poliscia de casa, se ven quarche epidemia, comme per exempio o cholera, sei i primmi à ësine colpïi; e pòi andæ à dî che ô càccian pe fâ moî a pövea gente. Ma mentre no trovæ tempo pe tegnî a casa netta, ve n'avansa pe andâ à l'ostaia e pe contâ di ciæti e taggiâ di cappòtti.
Tanta misëia a scomparieiva se ve convinsesci che l'educaçion e l'instruçion son e sole che pòssan levâ da mezo e cattive abitùdini. Comensæ donque à mandâ à scheua i figgeu, pe piccin che séggian, levæli de pe-a stradda. O Municipio, pòi, invece de spende di milioni pe un træto de stradda chi non arriva a-i çento metri, e guastâ l'architettùa di monumenti, saiva megio ch'o l'arvisse di ätre scheue infantili, affinché ghe foise pòsto pe tutti; i dinæ speixi pe quest'oggetto no faivan mäpró à nisciun. E se o Scìndico invece d'occupâse d'annescioin forsose o pensasse seriamente à l'educaçion infantile, rendendo l'instruçion elementare pe quanto l'è poscìbile obbligatöia à ògni ceto de personn-e, no se veddieiva e stradde popolæ de birichin, bìndoli e battosi, insolenti e despëtaddi, che daivan breiga à Cristo e pèrdan o rispeto a-o poæ e a-a moæ.

D'estate, nei quartieri in questione, si vedono i vicoli affollati di bambini stracciati, sporchi. Chi senza calzoncini, chi senza camicia, e alcuni nudi addirittura; con capelli che non hanno mai visto pettine. Donne oziose sulle porte di strada e delle botteghe a sparlare della vicina A e della vicina B; altre donne a farsi pettinare vicino alla bottega della fruttivendola, della venditrice di farinata o della lattaia; altre donne ancora di qua e di là a parlare del gioco del lotto, discorso prediletto di tutta le settimana: ora lascio dire a voi in quale stato si devono trovare le case di queste tali, che pulizia ci dev'essere.
Ma ciò che più fa stringere il cuore sono quei bambini allevati vagabondi. Sembrano proprio figli di nessuno! Molti dei loro parenti, dei loro genitori vanno a lavorare e li lasciano per la strada, alcuni perché non se ne curano e altri con la scusa che alle scuole infantili non c'è posto. Vi sembra questa una scusa sufficiente per lasciarli così abbandonati? Eppure molte volte tornando a casa li trovano feriti, perché si mettono insieme, formano delle squadre, e fra quartiere e quartiere si prendono a pietrate, dando dei problemi ai cittadini e ai forestieri, i quali, dall'indole del popolano, giudicano la città. D'inverno, poi, il freddo fa diminuire i bambini e le donne dalle strade. Però ragazzi se ne trovano qua e là sotto i portici a giocare a carte. Così piccoli gli lasciate prendere questo brutto vizio! Ciò che fa pietà è la condizione di quelli lasciati a casa da soli. D'estate (mi faceva giustamente osservare un tale) con un po' di frutta bene o male vivono; d'inverno invece hanno i geloni alle mani e ai piedi; pieni di freddo, sono sempre intirizziti, e molti stanno dalla mattina alla sera senza mangiare niente di caldo. Inoltre, questi bambini sono chiusi in casa, dove dalla sporcizia c'è un tanfo da non potere resistere. E perché c'è questa puzza? Perché padre e madre vanno via la mattina e tornano la sera per fare da mangiare e andare subito a dormire. La casa la riordinano la domenica. A questo modo il fisico ne soffre immensamente.
Non tenendo così in alcun conto a pulizia della casa, se si manifesta qualche epidemia, come per esempio il colera, siete i primi ad esserne colpiti; e poi andate a dire che lo diffondono apposta per fare morire i poveri. Ma mentre non trovate il tempo per pulire la casa, ve ne avanza per l'osteria, per fare pettegolezzi e maldicenze.
Tanta miseria sparirebbe se vi convinceste che l'educazione e l'istruzione sono le sole che possono fare sparire le cattive abitudini.
Cominciate dunque a mandare a scuola i bambini, per piccoli che siano, toglieteli dalla strada. Il Municipio, poi, invece di spendere dei milioni per un tratto di strada che non arriva ai cento metri, e guastare l'architettura dei monumenti, sarebbe meglio che aprisse delle altre scuole infantili, affinché ci fosse posto per tutti; i soldi spesi a questo scopo non dispiacerebbero a nessuno. E se il Sindaco, invece di occuparsi di annessioni forzose, pensasse seriamente all'educazione infantile, rendendo l'istruzione elementare, per quanto è possibile, obbligatoria ad ogni ceto di persone, non si vedrebbero le strade popolate di birichini, fannulloni e monelli, insolenti e dispettosi, che farebbero perdere la pazienza a Cristo e perdono il rispetto al padre e alla madre.

I romanzi pubblicati a puntate sui giornali in genovese non lesinavano critiche all'organizzazione sociale dell'epoca, alla Chiesa, ai sindacati. Ecco un brano tratto da Due compagne de scheua.