Bollezzumme!
Ciaeti da penscionae
(Aldo Rossi)
 

O Fasce
Ö Villa! Sciâ pensa a-i mâ speixi?

O Villa
Comme sciâ fa à saveilo?

O Fasce
Se ghe vedde da l’esprescion che sciâ l’é stæto toccòu into portafeuggio.

O Villa
Zà. A l’é sta faccenda de l’éuro... Sta stöia de 1936,27... A no me va zù.

O Fasce
Perché?

O Villa
Piggemmo pe bon o 1936, che pòi o l’é l’anno che son nasciùo.

O Fasce
Scì, piggemmo pe bon che sciâ l’é nasciùo quell’anno...

O Villa
Sciâ no ghe credde?

O Fasce
No. Pe ninte.

O Villa
E va ben, angoscioso, anno ciù anno meno... Ògni mòddo o l’é quello vintisette che à mi o me sta in sce l’ànima. O vintisette no l’ò mai posciùo comportâ: o l’ëa o giorno do stipendio e tutti i meixi quande arviva a busta me vegniva çerti sccioppoin de fotta!.. E òua te ô lì torna, sto aççidente de ‘n vintisette, ch’o te sciòrte feua con l’éuro, à compricâ e cöse. À fâte boggî o çervello à son de contezzâ!

O Fasce 
Ma existe l’éuroconvertitô... Dixe che o Berlusconi o ô regalla à tutti i çittadin...

O Villa
De sò stacca?

O Fasce
No, à speise do Stato.

O Villa
E allöa che diàscoa de regallo o l’é? Se ô paghemmo noiätri... No  no, mi ò vosciùo scordâme de lïe (che pòi pe noiätri ëan zà ‘nna valuta foestëa, visto che ê ciammàvimo franchi) e partî a-a primma con l’éuro. Coscì evitavo de contezzâ.

O Fasce
A me pâ ‘nna bonn-a idea.

O Villa
Bonn-a? Sciâ l’aspëte à dîlo!

O Fasce
A no l’à fonsionòu?

O Villa
A-i 31 de dexembre, pe partî pròpio da zero, me son scciuppòu tutti i franchi che aveiva inta stacca, e me so'accattòu un muggio de belinate. Coscì o giorno appreuvo, tutto regaggïo, son andæto à fâ refornimento de éuro a-o bancomat. E ben: dexe ëan zà veui, quattòrze no fonsionàvan ancon, in sciâ fin che ò giòu tutta Zena e òua son chì, arraggiòu comme un can! No gh’ò manco i dinæ pe-o tranvai!

O Fasce
Sciâ no se ascidie. Da vëi quelli comme voscià peuan viaggiâ de badda.

O Villa
E scì! O goerno insemme à l’aumento da penscion o ne dà ascì l’abbonamento à grati a-o tranvai! 

O Fasce
Sciâ lasce perde o goerno.

O Villa
D’accòrdio, ô lascio perde... Ma comm'a l’é che pòsso viaggiâ de badda?

O Fasce
Sciâ no l’à dïto de ëse arraggiòu comme un can?

O Villa
Scì.

O Fasce
E ben: i cæn, insemme a-i gatti, à Zena peuan viaggiâ in scî mezi pùbbrichi sensa pagâ de biggetto.

O Villa
Davvei? O goerno o l’à deciso...
 

O Fasce
Gh’ò giusto dïto de lasciâ perde o goerno.

O Villa
Perché? L’é proibïo parlâne?

O Fasce
Pe òua no. L’é solo perché o goerno o no gh’intra. A l’é l’AMT de Zena ch’a ne fa sto regallo... 

O Villa
Benìscimo! Allöa, dæto scì che son ancon arraggiòu comme un can, vaggo de corsa a-a fermâ, avanti ch’a me passe.

O Fasce
Momento. No l’é coscì fàçile: pe montâ sciâ deve aveighe o corezzin e o moriaggio.

O Villa
Comme? O corezzin e o moriaggio? O goerno o l’à stabilïo...

O Fasce
Ghe ô diggo torna: o goerno o no gh’intra.

O Villa
Sciâ l’ammïe: se parlemmo de corezzin e moriaggio, mi me sa tanto che o goerno o gh’intra.

O Fasce
Ö, diggo: sciâ l’é miga de l’ätra sponda?

O Villa
Comme sciâ se permette? Allöa anche voscià, che sciâ l’é de longo con mi a-i giardinetti!

O Fasce
Ma no, mi intendeiva politicamente.

O Villa
Ö, mi de polìtica no me n’accapiscio pròpio pe ninte. Penso solo che o goerno...

O Fasce
Sciô Villa, devo andâ via de sprescia. Sciâ tegne, chì gh’é 0,77 éuro pe-o biggetto. Pòi con còmodo sciâ me î daià. À revéddiçe!

Töa do contegnùo