O Villa
Ò, Fasce! Sciâ no s'é ciù fæto vedde da 'ste parte.

O Fasce
Pe fòrsa, dòppo quello che l'é successo...

O Villa
Perché? Cöse l'é successo?

O Fasce
E sciâ me ô domanda ancon? O G8, i scontri, tutti i casin che gh'é stæto.

O Villa
Mi no ne sò ninte. No gh'ëa. M'aveiva ospitòu un mæ cuxin.

O Fasce
Donde?

O Villa
À Bösanæo.

O Fasce
À Bösanæo? Pròpio lì? E sciâ me dixe de no saveine ninte?

O Villa
Sciâ scuse: se l'à dïto un ministro, de no saveine ninte, perché no pòsso dîlo mi ascì?

O Fasce
Reçevùo. Sciâ l'é pròpio un bello generin, sciâ se mette à vento.

O Villa
Mi? Mai ciù. Se mai à vento se gh'é misso o ministro.

O Fasce
Bon, beseugna accapîli, i ministri. Àn famiggia.

O Villa
Noiätri invece... Vidoi, sensa figgi... comme se ghe dixe? Single e pe de ciù penscionæ. Çerte preoccupaçioin no ghe l'emmo.

O Fasce
Peò ghe n'emmo de ätre. 

O Villa
Prexempio?

O Fasce
Prexempio mi me ascidia quello terrorista ch'o s'asconde inte l'Afganistan.

O Villa
À scì, quello che o Bush o veu destrùe. Ben, ma quello lì o l'ascidia tutti.

O Fasce
Ma mi son in anscetæ ciù che tutto pe Zena.

O Villa
Sciâ se spieghe.

O Fasce
Sciâ vedde, quelli dell'intelligence, ò comme diàscoa a se ciamma, americann-a no me pan guæi asperti. No vorriæ che o piggéssan pe zeneise e vegnìssan à dâne recatto.

O Villa
E perché dovieivan piggiâlo pe zeneise?

O Fasce
O no se ciamma Belin Laden?

O Villa
Ma no! O l'é Bin Laden!

O Fasce
Davvei? Aveivo sbaliòu stradda! Segnô, te ringraçio.

O Villa
À propòxito, sciâ me fa vegnî in cheu un ätro che o ringraçia o Segnô pe aveighe fæto trovâ torna a stradda giusta.

O Fasce
E chi o l'é?

O Villa
Quello vesco, o Milingo. 

O Fasce
À, quello ch'o s'ëa sposòu.

O Villa
Scì, ma òua o s'é remisso in sciâ bonn-a stradda.

O Fasce
È zà. O l'à mollòu a moggê...

O Villa
Ò lezùo che se son incontræ inte 'na càmia d'abergo...

O Fasce
Scì, ma gh'ëa anche o cardinal Navarro...

O Villa
Scì, ma à 'n çerto momento o cardinal Navarro o se n'é andæto e o l'à lasciæ soli.

O Fasce
Cöse o l'avià fæto o Milingo solo con a moggê inte 'na stansia d'abergo?

O Villa
Sciâ l'é pròpio un maiçioso! Cöse sciâ veu ch'o gh'agge fæto? O gh'avià fæto un esorcìximo, no? 

O Fasce
Bravo! A l'é andæta pròpio coscì. Ghe l'assegùo: papale papale.