O Fasce
Davvei, no se ne poeiva pròpio de ciù. E Rutelli e Berlusconi e Rusconi e Berlutelli!

O Villa
E quello Porta a porta ch'o n'angosciava pe tutta a neutte!

O Fasce
Mi me pensava che, con fâ o governo, o Porta a porta o scangéssan con unn'ätra trasmiscion...

O Villa
Cioè?

O Fasce
Carega à carega, no? A vegniva ciù à taggio.

O Villa
Eh, scì! Pe attrovâ 'nna carega pe tutti àn dovùo fâ doî ministri de ciù.

O Fasce
A sto propòxito o dovieiva dâse da fâ anche o Comune, chì a-i giardinetti: de vòtte noiätri penscionæ, che semmo tanti, no trovemmo da assettâse.

O Villa
E cöse sciâ vorrieiva, che o Comune o ne regalesse un ministero?

O Fasce
Un ministero no, ma quarche banchetta in ciù, magara...

O Villa
Tranquillo: òua gh'é i dinæ do G 8 e attrovian anche quelli pe fâ e banchette.

O Fasce
Chì a-a Döia? No me ô creddo pròpio. I travaggi i fan in çentro, donde ghe passià o Bush.

O Villa
Faian e banchette ascì?

O Fasce
Segùo, o Bush ascì o l'à bezeugno d'assettâse, d'ògni un pò.

O Villa
Zà, m'àn vosciùo dî che de soventi ghe gïa a testa...

O Fasce
Perché o l'è stanco?

O Villa
No, perché o l'é imbriaego. Ô, attento: me l'àn vosciùo dî!

O Fasce
Ò accapïo, alloa, perché o l'é tanto amigo do Berlusconi!

O Villa
E perché?

O Fasce
Appreuvo a-o Berlusconi gh'é de longo o Buttiglione...

O Villa
Bella battùa! Beseugna fâla circolâ.

O Fasce
Scì, ghe faiëmo fâ o gïo d'Italia.

O Villa
Ah no, sciâ ô lasce perde. 'Nna deluxon!

O Fasce
Davvei! Tutto quello doping!

O Villa
Mi me despiaxe pe quello corridô, o Frigo.

O Fasce
Â, quello ch'àn mandou via perché gh'àn attrovou de sostanse strannie.

O Villa
Lê o dixe ch'o ghe l'aveiva lì, ma che no l'addeuviava.

O Fasce
Un colleçionista, insomma. Ma sciâ se ô credde?

O Villa
Perché no? Mi, prexempio, son filatélico, ma i francobolli da mæ colleçion no me î còllo miga.

O Fasce
Bon, òua vaggo. Veuggio piggiâme 'nna bocconâ d'äia.

O Villa
E donde sciâ va?

O Fasce
À Corniggen.

O Villa
E pròpio lì sciâ va à çercâ l'äia?

O Fasce
Scì, perché lì gh'é 'nn'äia tutta speciale: äia de liçensiamenti. Çe veddemmo, Villa!