O Villa
E i onorévoli? I senatoî? Son restæ sensa teito, meschinetti?

O Fasce
Mà... Dixe che àoa se n'andian tutti in campagna...

O Villa
Bene! L'ea tost'öa che se mettéssan a sappâ a tæra! 

O Fasce
Sciâ me lasce finî: in campagna elettorale. Ciaschedun o s'arrobattiâ into sò collegio...

O Villa
Insomma: van in campagna o in collegio? Ò, che pe mi pòi no fa guaei differensa: importante l'é che, inte quarche mainëa, se ghe dagghe 'nna giusta puniçion.

O Fasce
À l'anima! Sciâ l'é pròpio inveddròu!

O Villa
Pròpio! Piggio feugo pe ninte!

O Fasce
À propòxito de piggiâ feugo... sciâ l'à viste, in televixion, quella ministra e quella onorévole che se son asbriae unn-a in sce l'ätra?

O Villa
No. Mi e trasmiscioin de bòssa no l'ammïo.

O Fasce
Ma a no l'ea 'nna trasmiscion de bòssa. A l'ëa "Porta a porta".
 

O Villa
Porta a porta? Ò accapïo: 'nna trasmiscion de foot-ball... No, no ammïo manco quelle.

O Fasce
E cöse l'é che sciâ vedde, allöa, in televixon? Scommettiamo che, Grande frae, Carramba?

O Villa
Ma perché devo consummâ da corrente, quande gh'é i giornali che no parlan d'ätro, te cóntan tutto pe fî e pe segno?

O Fasce
Ben, ma a-o meno 'nna trasmiscion sciâ â veddiâ, no?

O Villa 
Unn-a scì: e previxoin do tempo.

O Fasce
Peò anche quelle son in scî giornali.

O Villa
Scì, ma in televixon gh'é o Bernacca.

O Fasce
Cöse sciâ dixe? O Bernacca o no gh'é ciù da 'n muggio d'anni!

O Villa
O no gh'é ciù?

O Fasce
E no!

O Villa
O beliero! Ti veu vedde che tutte e votte ch'arriva e previxion do tempo mi me son zà addormïo?

O Fasce
Allöa, se sciâ s'addòrme in sciô ciù bello, sciâ no l'avià manco visto quello programma ch'o se ciamma Satyricon.
 

O Villa
Quello ascì l'ò lezzùo in sciô giornale. T'àn acciantòu un bello casin, me pâ...

O Fasce
E comme! Che pòi mì no accapiscio perché o Berlusconi o ghe l'agge tanto con quello còmico, o Luttazzi. Ciù ò meno àn e mæxime idee.

O Villa
Davvei?

O Fasce
Ma scì! O Berlusconi o dixe che l'Italia o l'é un paise da correze, o Luttazzi o dixe ch'o l'é un paise de merda... E no semmo lì?

O Villa
Bon, aggiustémmoçe un pò a bocca... Parlemmo da nòstra region.

O Fasce
Benìscimo. Allöa... a Portofin àn fæto o mortöio da contessa Vacca, a Marasci se son dæti de cotellæ, a Ponente, con l'aegua che l'é vegnùo, o l'é tutto un gran derruâ, a Sanremmo àn faeto o Festival...

O Villa
E questo sciâ ô ciamma aggiustâse a bocca?

O Fasce
Cöse scia veu che ghe digghe? No posso fâghe passâ pe novitae e solite rattelle pe Corniggen e pe o G8... Momento... effettivamente 'na novitae a gh'é: into refâ a pavimentaçion àn descoverto doe balle de trei sécoli fa in San Loenso.

O Villa
Solo? Ti sae quante pavimentaçioin dovian refâ pe tiâ feua tutte e balle che n'àn appillottòu dòppo? Öu, trei sécoli de balle, miga ninte! 

O Fasce
Effettivamente àn promisso de pavimentâ tutte e stradde de Zena.

O Villa
Cianta ao posto! Coscì àn zà tiou feua a balla ciù grossa!