O Villa
Cäo o mae Fasce, che piaxei! Me pâ mill'anni che sciâ no se fa vedde a-i giardinetti!

O Fasce
Perché, voscià con tutta l'ægua che l'é vegnuo sciâ s'é presentou de longo chì?

O Villa
Pe fòrsa: in gïo a casa mæ deliggiava tutto! Chì a-o manco stavo a-o segùo. 

O Fasce
'N açidòro, che desastro!

O Villa
Ghe mancava ancon o deluvio, dòppo quella stæ "torrida"!

O Fasce
A stæ "torrida"? 

O Villa
"Torrida, torrida"! Da scciuppâ da-o cädo! Ne l'aveivan annonsiâ con seguessa tutti i meteoròloghi, sciâ no s'arregòrda?

O Fasce
Ah scì, aoa me sovvegne. A dev'ëse vegnùa, m'an dito, un mäcordì d'agosto. Ma mì no gh'ëo, ëo in montagna, e no me ne son accòrto.

O Villa
Sciâ saià affortunòu! Quello mäcordì lì se boggiva. Ancoassæ che o giorno appreuvo faxeiva dexe graddi, coscì çe semmo un pò repiggiæ.

O Fasce
Se sti meteoròloghi avéssan annonsiou con tanto antiçipo anche tutta l'aegua d'ötunno, fòscia se saieiva posciùo fâ quarcösa. Magara quarche liggia de meno...

O Villa
E invece... Or! Miggiæ de miliardi de danni!

O Fasce
Aoa pàrlan de 'n prestito internaçionale...

O Villa
Bonn-a questa! Un prestito? E comme femmo à dâgheli in derrê?

O Fasce
Oh, pe quello no gh'é problema. Ghe mandemmo o Giovanotti à cantâghe "Cancella i debiti"... Comme à San Remmo.

O Villa
Eh scì, aoa spedimmo o Giovanotti in gïo pe-o mondo a fâghe o rap!

O Fasce
À mæ giudiçio bastieiva mandâlo in América. A l'é a naçion ciù importante.

O Villa
Ma sciâ ghe l'à testa? Aoa comme aoa l'América a no l'é in graddo de scancellâ pròpio un bello ninte. A l'à avùo tròppe speise.

O Fasce
In che senso?

O Villa
Con tutte quelle schede contæ à man...

O Fasce
E ben?

O Villa
Belandi, Fasce! A-a giornâ d'ancheu i travaggi fæti à man végnan un pestasso de dinæ! Sciâ se rende conto?

O Fasce
E va ben... ma allöa comme femmo à levâçe o poffo?

O Villa
Mi unn'idea ghe l'avieiva...

O Fasce
Sciâ digghe.

O Villa
De chì à quarche meise à Zena ghe saià o G 8, no? Arrivià chì tutti i cappi de stato, no?

O Fasce
E allöa?

O Villa
Î portemmo à l'incroxo da Questùa quande gh'é un bello ingorgo, de quelli marca Winkler/Merella, e ghe î lascemmo finn-a che no scancéllan i poffi e, magara, gh'azzónzan 'nna contribuçion volontäia.

O Fasce
E bravo Villa! Sciâ saieiva 'n òttimo ministro de finanse!

O Villa
De fæti o Berlusconi o m'à çercou pe-o so pròscimo goerno... Sciâ se figùe, larghê comme o l'é, o m'à finn-a offerto un releuio do Milan. Ma mi gh'ò dïto de no.

O Fasce
Modesto?

O Villa
No. Genoano.