O FASCE - Sciâ vegne, sciô Villa, sciâ s'assette chì, che demmo 'nn' euggiâ a-o giornale e intanto se gödimmo un pò d'äia bonn-a. O VILLA - Scì, femmo finta de ëse in çentro quande gh'è e doméneghe a pê. Ah, comme se ghe respïa! O FASCE - Peccòu che no ê fàssan ciù, e "doméneghe verde". O VILLA - No ê fan ciù? O FASCE - No, gh'è in sciô giornale. Dixe che son sensa dinæ. O VILLA - Te lascio dî che sæximo! Ciàntan lì e "doméneghe verde" pròpio quande son a-o verde! O FASCE - Cöse gh'è de neuvo ancheu? E dàgghea con 'sta stöia che Zena a l'è a çittæ con ciù tanti vegi! O VILLA - Donde l'avian visti, tutti 'sti vegi?! In gïo se vedde solo da gente a-o mascimo a-o mascimo da nòstra etæ… E donca… O FASCE - D'ätra parte, sciâ ghe fasse caxo: à l'Abergo de Castelletto gh'an misso un commissäio perché o l'è inte canne. E quande l'è che un Abergo o va inte canne? Quande no gh'è de casann-e… E donca… O VILLA - Ma scì, quella di vegi a l'è 'nna miccia. Sciâ l'ha visto quarche ätra notiçia? O FASCE - Donque… O neuvo Prescidente da Region e o Scìndico Pericu se son incontræ. O VILLA - E comme a l'è andæta? O FASCE - Mah… an ciacciaròu doe öe e mëza, ma an remesciòu pöco ò ninte. A l'è andæta ben a-o Biasotti: sciâ sa comme a l'è a polìtica, 'nna pòula a tïa l'ätra… e o l'è riescïo à vende a-o Pericu 'nna bella Mercedes ùrtimo modello. O VILLA - Catalizzâ? O FASCE - Pe fòrsa! O Scìndico o deve dâ o bon exempio. O VILLA - E… sciâ me digghe un pò: gh'è scrïto ninte in sce quello film che an ciantòu lì de giâ? Comme o l'ëa? L'Angelo di serie B..? O FASCE - Pe piaxei, sciâ no me parle de serie B! O VILLA - Scia l'è sandoriano, pe caxo? O FASCE - No, genoano. Gh'è differensa? O VILLA - Nisciunn-a. O FASCE - Ògni mòddo o film o l'è L'Angelo di seconda classe. An desbaraccòu tutto, dìxan, perché se son accòrti che o Villaggio, o protagonista, o no pertusava o vìdeo. O VILLA - O Villaggio? Quello compatriòtto ch'o l'à dïto che Zena a l'è 'nna çittæ do belìscimo, un mortöio? O FASCE - Quello. O VILLA - Un bell'aggibbo! E comme o faià à pertusâlo, o vìdeo? O FASCE - M'an
vosciùo dî che o çerchià de reçitâ.
Sciâ sa, co-i film, i libbri de Fantozzi, o no l'à ancon avùo
o tempo.
|