| Liguia News
a l'è unna revista scrïta in zeneise de pròscima sciortïa:
pe òua gh'è söo che di nùmei de preuva. Saieiva
de grande importansa che a Liguia, unna region da-e caratterìstiche
mai tanto fòrte, preçise e originale à pëto de
sò vexinn-e, a poëse aveighe un giornale scrïto inta sò
lengua, ch'o se fesse portavoxe de sò instanse, di sò inteesci,
de fronte à tutti. Quelli che pensa che un giornale pægio
o dovieiva existe, peuan compilâ a form chì sotta pe fâne
savei a sò adexon: quande aviëmo inscriçioin à
basta, porriëmo partî con sto neuvo progetto. Eive un exempio
di artìcoli de Liguia News.
"I LIGURI: ETNOGENESI DI UN
POPOLO"
O libbro de Renato Del Ponte
o torna à scrovî e orìgine di Lìguri à
'na mainëa sencia e completa.
Into paleolìtico (20000
anni fa) l'è comensòu l'avventùa di Lìguri
in sciô planeta Tæra. I seu primmi segni î trovemmo inti
Baussi Rossi, unn'àrea deuviâ pe-a caccia e pe de pràtiche
magico-religiose (riti ligæ a-a feconditæ, a-o scorrî
do tempo). Ma semmo söo che a-o prinçipio de 'n cammin
evolutivo affascinante, che l'autô o ô træta con
partî da di importanti reçercatoî lìguri -o Celesia
e o Lamboglia-, ma o continua à desviluppâlo da pe lê,
graçie à de reçerche portæ avanti pe 'na vintenn-a
d'anni inti campi ciù differenti: archeologìa, antighe religioin,
criminologìa, genética, linguìstica, lettiatùa,
stöia etc.
Unn'òpia che coscì
a l'è de gran valô, no solo pe stòrichi e studdioxi,
ma pe tutti quelli che àbita a LIGUIA, perchè a ghe permettià
de capî a Tæra onde stan e sorvetutto de riappropiâse
de reixe che ne liga à sto territöio chì.
RENATO DEL PONTE À
R.L.C.
(Tòcchi da presentaçion
do libbro à Radio Lanterna City)
"Mi son partïo da-o
Lamboglia e da-o Celesia, ch'o l'ha scrïto Le Teogonie dell'Antica
Liguria, ma dappeu ò effettuòu de reçerche da
pe mi in scî nòstri antecessoî (viso, gruppo sanguìneo,
struttùa de òsse...) I primmi segni son inti Baussi Rosci
e in sciô Finâ, inta primma fase do paleolìtico, un
perìodo de tempo equivalente ciù nì meno à
20000 anni fa. Söo che i Lìguri gh'an avùo a poscibilitæ
d'avei vintimïa anni de stöia...
Clima ceppo, presensa d'assosti
còmodi son di fattoî ch'an reiso poscìbile sto miäcoo
chì. E tann-e vegnìvan deuviæ sorvetutto pe assosti,
pe-a caccia e pe compî di riti magico-religioxi. L'è importante
sottoliniâ che finn'òua l'appròccio elitäio o
l'escluddeiva a ciù parte de personn-e da avvexinâse à
sti argomenti chì. Ma 'nna mainëa de scrive sencia, comprenscìbile
a rende e a rendià ciù fàçile lëze e capî
sto tipo de temàtiche ."
|
|
Bollezzumme!