Marianna e l'orso

Marianna e l'orso
(föa cheuggeita da Elsa Pastorin)
Unna vòtta gh'ëa unna figgetta de nomme Marianna, ch'a stava de cà co-a madonnâ. A l'ëa unna figgetta asperta e allouïa e, pe-a nâ zà avanti con l'etæ e un pò strafaläia, a l'ëa d'aggiutto e de compagnia. Ghe piaxeiva dâ unna man à fâ i loei de cà, ò à impastâ o pan, ò à fâ, comme a nâ, tante belle torte. Un giorno, ch'a l'aia da cheuxe o pan, a s'è adæta che gh'ëa ciù pöco legne, coscì a l'é camminâ into bòsco à cheuggine un pittin, ma sensa ch'a se ne rendesse conto, gh'é arrivòu addòsso un orso, ch'o l'à agguantâ e o se l'à rebellâ à cà pe mangiâsela. Tutta inspaximâ, a Marianna a l'à comensòu à ciammâ aggiutto, ma into bòsco no â sentiva nisciun. Visto ch'a se metteiva mâ, a l'à çercòu à mette in deuvio a seu aspertixe pe poei sarvâse a pelle e, con fâse do cheu, a gh'à dïto: Orso, se ti me lasci a vitta, te daggo a mæ pòula che tutti i giorni te inandio de tutte e smerse de torte döçe con tanto amê, cremme e ciccolata e mille ätri döçetti da perleccâte! L'orso, ch'o l'ëa un leccardon, no gh'é pasciùo manco vëo e, de drïto, o l'à açettòu o patto. Stæti arrivæ à cà de l'orso, a figgetta a s'é inzegnâ à inandiâghe ben ben de torte pe impîghe a trippa e fâlo stâ bravo. Dappeu d'avei derruòu di dösci à scciattapansa, o s'é appaxentòu e o se n'é anæto à dormî. Pe quarche giorno e cöse son anæte ben; ansi, l'orso o s'ëa scinn-a affeçionòu a-a Marianna, ch'a stava a-o zeugo e a ghe dava da intende ch'a saiæ arrestâ pe de longo con lê. In cangio a pensava a-a madonnâ, che à quell'öa a no l'aia ciù de pan, e coscì a l'aspëtava de piggiâ a balla a-o botto. Visto che l'orso o s'ëa quetòu ben ben, a s'é fæta ciù ösadda e a gh'à domandòu se o lindoman mattin o ghe portava à seu madonnâ un sacco de pan. Lê o gh'à respòsto de scì. Peò - a continuava - ti me prometti che no ti t'affermi into bòsco e no ti arvi manco o sacco do pan. Dappeu, quand'o vegniva in derrê, o l'aviæ attrovòu unna torta stramezuâ. Quella seia o l'é anæto à dormî pin comme un euvo e intanto a Marianna a continuava impastando e cheuxendo de græn micche de pan. A-a mattin de bonn'öa a s'é infiâ into sacco, a l'à misso i panetti de d'äto e dappeu a l'à acciammòu l'orso, con dîghe l'ëa öa de partî. Lê o l'é sätòu sciù d'in letto, o l'é camminòu in coxinn-a, o l'à visto o sacco ch'o l'ëa zà lesto, o se l'à misso in sciâ spalla e via verso o bòsco. Ma, comm'o l'à fæto un pò de cammin, o l'à comensòu dindo fòrte: Òua m'appöso e dappeu me mangio unna michetta. Ma allöa o l'à sentïo a voxinn-a da Marianna, ch'a dïva: Orso, tégnite à mente a teu promissa, vanni drïto! E coscì o l'à continuòu a stradda pe 'n bello tòcco, ma pòi o s'é appensòu che a figgetta a doveiva ëse lontann-a ben e o l'à dïto torna ch'o s'affermava pe mangiâ, e torna o l'à sentïo a voxetta da Marianna. Allantöa o l'à tiòu drïto e in sciâ fin ch'o l'é arriòu de fronte a-a pòrta da madonnâ, o l'à appösòu o sacco e o l'é anæto in derrê pe-a mæxima stradda. Coscì a Marianna a l'à posciùo sciortî d'into sacco e abbrassâ seu madonnâ, tutta contenta d'aveila scampâ bella.