Bollezzumme! Attualitæ
Bollezzumme!
Attualitæ
|
"L'invaxon di Ultracòrpi" o l'ëa o tìtolo de
'n cine de fantasciensa anni '50, ma co'un pittin
d'adattamento o vegne à taggio ancheu ascì, pe dî
cöse l'é intravvegnùo à Zena inte l'occaxon do G8,
visto che gh'é stæto ben ben da gente che, in mæ
davvei, a s'é lasciâ clonâ da 'nna misteiosa (ma manco
guæi) voentæ estrannia, e òua in gïo gh'é söo che
de còpie, che ripétan à pappagallo i slògan tutti
pægi, stæti remenæ à l'infinïo da aradio, televixon
e giornali. E scì, perché i vëi protagonisti de sta tragedia no son i G8, nì i manifestanti, e manco a poliçia, ma son pròpio i giornalisti, che pe de giornæ, avanti a riunion di cappi de Stato, an dæto ciù spaçio che poeivan a-e "raxoin" di antiglobal, comme se ste raxoin fïsan davvei quarcösa da piggiâ in sciô serio, quande in cangio no rappreséntan segùo de veitæ scientìfiche, e i specialisti e i sciensiæ - in sce sti argomenti - no se son ancon missi d'accòrdio; ansci, se se fa de ste riunioin e discuscioin d'ærto livello, l'é pròpio perché no gh'é nisciun accòrdio in scê caxoin de l'effetto særa, ò do pertuso inte l'ozòno, e in sce comme se peu fâ pe accompagnâ o proçesso de globalizzaçion inte 'nna mainëa ch'a no fasse guæi de danni. Se foïse tutto ciæo e segùo, no ghe saiæ de beseugno de discuscioin. Òua, sti argomenti saieivan da affrontâse con tutta a prudensa poscìbile; chì, in cangio, pe televixon ç'emmo dovùo sciorbî söo che e frase fæte di antiglobal, che se créddan d'ëse i ùnichi depoxitäi da veitæ e che o mondo o segge solo gianco e neigro, sensa sfummatùe de mezo. Se gh'ëa quarchedun ch'o â pensava à 'nn'ätra mainëa, no ghe dàvan peiso. No se trattieiva de mette o moriägio à nisciun, ma quande gh'é un ch'o fa de affirmaçioin greive comme "i G8 no son lezittimæ à deçidde", besorieiva che ghe foïse de drïto quarchidun de qualificòu à respóndighe che quella lì a l'é unna balla, perché i G8 son lezittimæ da-o voto democràtico di seu elettoî; in cangio, se lascia che l'antiglòbal o continue à stralabiâ pe de öe, sensa che nisciun o contradixe. Coscì, s'é vosciùo dâ l'önô de primme pàgine e de interviste à repetiçion à de gente che no se sa che meiti gh'àggian, feua che quello d'ëse di presuminoxi e, comme s'é pòi descoerto, di böxardi e di mastrussê, che se fävan ciammâ paxifisti tanto che dàvan arme e bacchi a-i violenti. Despiaxe che a-e ciacciäre, a-o sbraggiâ abbrettio di antiglobal se ghe segge mescciòu ascì de gente oneste e in bonn-a fê, ma bisà dî ciæo che, inta pràtica, i paxifisti, anche sensa voei e in desdaxo, an creuvïo i violenti. Se i paxifisti avéssan avùo pe davvei a-o cheu a paxe e o bon stâ di zeneixi, con tutto quello che l'ëa zà intravvegnùo à Seattle e à Göteborg, no avieivan manifestòu pe ninte. E, in cangio, se son fæti maneuvrâ da 'nna regìa fucca e asperta, ch'a î à deuviæ, pægio che di marionetti, ch'a dïva de voei forsâ a "zòna rossa", ma solo pe tegnî occupâ a poliçia, tanto che i "black blockers" metteivan tutto à færo e feugo. O basso livello intellettuale, coltuale, polìtico di rappresentanti di antiglobal, in sciâ fin, o dovieiva rende ciæo à tutti che ascì sti cappi pòpolo son söo che di òmmi de paggia inte moæn de quarchidun ch'o s'avvarda ben de fâse conosce. E, à propòxito, cöse avian vosciùo dî tutte quelle strasse rosse che i manifestanti sbandëtàvan da tutte e parte? A-a giornâ d'ancheu, da dòppo che tutti conóscian - ò dovieivan conosce - i delitti do comunìximo, un ch'o va in gïo à locciâ de bandëe rosse beseugna ch'o no segge guæi ben co-a testa, ò ch'o segge unna gran leggera: de segùo peò o no peu fâse passâ pe paxifista. Quello che mette ciù angoscia, l'é che sti gloioxi anàrchichi, ò anarcocomunisti, che despréxan a vitta, e palanche, o travaggio di ätri, e donca dovieivan aveighe ascì o moro de affrontâ e conseguense de quello che fan, e magara ëse pronti à moî pe ste sò idee (cösa ch'a î porrieiva rende un pittin ciù rispettàbili e credìbili), à sti anàrchichi, diggo, gh'é bastòu de piggiâ quarche ronson da-a poliçia e son corrïi de ficco à cianzussâ davanti a-e telecàmie che o poliçiòtto cattïo o gh'aiva fæto a boa. E an trovòu a-a primma quelli che se l'à creddùa, e î an defeixi, comme se dâ feugo à màcchine e negòçi o foïse un comportamento normale e açettàbile, e punî i ferrabutti, in cangio, un atto da condannâ. O giorno appreuvo a-i fæti, quelli stæti lasciæ sciortî d'inta prexon de Bösanæo an contòu de böxìe vergognose in sce quello che, à sentîli lô, saieiva successo e i giornalisti televixivi mandàvan tutto in onda, sensa assunnâse manco de dâ voxe à chi poeiva smentî quelli contamosse. E preuve che no l'ëa vëo ninte son sciortïe feua dappeu: ma inte guære pscicològiche, comme sta chì, a l'é a primma imprescion quella chi conta, perché a l'é quella ch'a dùa de ciù e a l'arresta into çervello, e coscì òua, quande se parla di "greivi fæti" de Zena, se pensa söo che a-e bòtte ch'à piggiòu, ò che dixe d'avei piggiòu, i manifestanti, e a-o mòrto pe desgraçia che gh'é stæto, e no a-e violense ch'à dovùo patî e gente oneste inte quelli giorni. Ma de gente oneste, quelle che fa o seu dovei inta vitta de tutti i giorni, sti giornalisti se n'infocciäran, perché no fan notiçia: à lô gh'é ciù cäo cæzâ i anàrchichi, che son di nòbili idealisti. Nisciun che ghe baste o figæto de dî a veitæ: che a poliçia a l'à fæto ben à sunnâle a-i "manifestanti", e a l'avieiva dovùo cioccâghene ancon de ciù. Morale: quarche meise appreuvo, i antiglobal son tutti feua de prexon, i ciù violenti ascì, e torna pronti à méttise à scciappâ, à strosciâ, à dâ feugo à tutto quello che gh'accàpita (inte quarche ätra çittæ, se spëa). L'invaxon di Ultrapòrchi a continua. O segondo atto emmo dovùo sciorbîselo dòppo i unze de settembre, con l'attacco a-e Töre Binelle de Neuva York. I terroristi islàmichi en liätri ascì di nemixi de l'América e da globalizzaçion: gh'an de ambiçioin ciù grandiose, se capisce, e i antiglobal nostræ son di frilli, a-o confronto, ma pe do resto son pægi: mæximo desprexo pe-a vitta di ätri, pe-o travaggio, pe-e speanse, pe-a fadiga de l'òmmo, mæxima divoçion fanàtica à un ideale astræto e imposcìbile da realizzâ; liätri ascì gh'an di prævi che î benïxan, che da niätri conrespóndan à Dòn Gallo e à tutti i ätri fanàtichi prævi "de frontëa", e che o seu egoìximo da abbelinæ veuan fânelo passâ pe "voentæ do Segnô". Sta caterva de giastemme a no meitieva de commenti, se no fïse che, dòppo i primmi giorni de àgrime de crocodillo pe-i mòrti de Töre, i giornali an comensòu torna à sciusciâ into feugo da poïa da guæra e di ideali "paxifisti". Dòppo quello ch'à fæto o Bin Laden e i seu cómprixi, tutti quelli che no son solidali co-i Stati Unïi, besorriæ spuâghe inte 'n euggio; ma tant'é, chì coscì bisà ancon sentîse dî che i terroristi "quarche raxon ghe l'an", comme se i seimïa mòrti e passa de Neuva York déssan quarche sollevo a-e misëie di palestineixi e di irakæn, à parte o fæto che i arabbi, de sò desgraçie, faieivan megio à accaxonâne a sò testardaia e i sò goerni ciù che i Stati Unïi (e pensæ un pittin se tutte e etnie oppresse into mondo dovéssan reagî comme i palestineixi). Ma i giornali contìnuan à dâ do spago à chi dixe de ste belinate e, ansci, an constreito o Prescidente do Conseggio à fâ marcia in derrê quand'o l'à dïto quello che tutti pénsan, ma che no dixe nisciun: che a çiviltæ oçidentale a l'é supeiô de pe coscì à quella islàmica. Che pòi a l'é a veitæ: a çiviltæ islàmica, pe tante raxoin, a l'é arrestâ in derrê confronto à niätri e l'é di sécoli ch'a no prodùe ciù ninte; çerti mossulmæn, pòi, son arrestæ a-i tempi de Croxæ, à l'ïa pe-o Crestian da levâ da mezo à tutti i conti. Che i Crestiæn ascì àggian commisso à sò tempo i mæximi erroî, o l'é un fæto; söo che niätri, dòppo, gh'emmo avùo a Reforma, a Contrareforma, emmo dovùo fâ i conti con tutta a filosofia d'oçidente, con Pascal e Cartesio, l'Inluminìximo, Kant, l'Existensialìximo e Maritain, tanto pe fâ quarche nomme. A nòstra religion a l'à dovùo arrösâse de fronte a-e libertæ che lê mæxima a l'aiva contribuïo à inzeneâ, co-a seu conçeçion do primmô da personn-a. Inte l'Islam no gh'é stæto ninte de pægio, e ansci çerti seu prævi tïan sciù i zoeni into desprexo e inte l'ïa pe tutti quelli che no son comme lô e, se arriéscian à convìnsili, l'é söo che graçie a-a misëia e à l'ignoansa. I nòstri giornalisti, çerti nòstri polìtichi, se ne stan lì tutti pensamentoxi, à domandâse cöse bisà fâ, pe vinse o terrorìximo: ma gh'æi mai dæto mente inte che condiçioin vìvan, sti desgraçiæ de Afghæn, de Palestineixi, de Irakæn? Pe fòrsa che s'attàccan a-a religion, comme se no ghe fïse ätro a-o mondo: pe liätri no gh'é nint'ätro d'in davvei. "Ma ascì ben che se leva da mezo i cappi, pòi ne sciòrte di ätri" ghe dixe i paxifisti. Ma intanto comensemmo à levâ da mezo sti cappi chìe, che son di delinquenti che à moî da kamikaze no ghe van lô, ma ghe màndan di ätri, quelli che no san pensâ co-a seu testa. E scì, perché che raxonamenti o saià bon de fâ, de che coltùa o saià o portòu, che iniçiative o savià piggiâ, un meschinetto de gabibbo, ch'o se credde che s'o meue inta guæra santa o va drïto affionòu into Pareiso de Allah? E ch'o se ô credde perché l'an tiòu sciù coscì fin da piccin, pe fâ da servo a-o miliardäio terrorista, che, ciù affortunòu, o l'à studdiòu in Oçidente? Levæ da mezo i cappi e, zà che ghe sei, comensæ à impîghe a pansa, a-i meschinetti, à dâghe do travaggio, de bonn-e scheue, à dâghe a poscibilitæ de fâse un avvegnî co-e seu moæn, inti sò paixi. Dæghe un livello de bon stâ, ch'o s'assomegge a-o nòstro, e ghe veddiei, se i terroristi no scéntan comme a neive a-o sô; in sciâ fin che pe aveila vinta in sciô terrorìximo che veu de ciù de globalizzaçion e no de meno. Dæghe unna vitta ciù pægia a-a nòstra, ch'a l'à tanti mendi, ma ch'a n'à dæto scheue, vitta còmoda, progresci da meixinn-a, poscibilitæ d'esprimme a nòstra opinion, libertæ pe-e dònne d'anâ vestïe comme veuan lô. Comme dî che, chì coscì, se quarchidun o vinsià a guæra contra o terrorìximo, o saià o "geneale McDonald". |