Bollezzumme! Attualitæ
Bollezzumme!
Attualitæ
|
Che do XXI sécolo ghe saià o retorno de guære de
religion ô dixan un pò tutti. Adreitùa ô dixeiva,
ciù de çinqueçento anni fa, finn-a quello mistëioso
personaggio (ò contamosse, à segonda di ponti de vista)
do Nostradamus. O neuvo sécolo o comensa donca con 'nna
guæra inspiâ da un fanatìximo religioso che a nòstra
coltûa a giaminn-a à capî. L'attacco a-e töre de New
York o no l'é söo un atto terrorìstico: in tanti an
parlòu de atto de guæra, de 'nna guæra tra o mondo
islamico e l'oçidente. No beseugna sconfonde i
integralisti co-a religion ò o mondo islàmico, ma a
differensa a no l'è poi guæi ciæa. Ascì perchè se
a-a fin o Allah o ciamma, o mossulman o deve responde. I
atti de violensa de settemann-e passæ m'an fæto vegnî
in cheu i attacchi che, à partî da-o 650 d.c, i Möi
(ò Turchi, comme ghe dïvan allöa) portàvan a-e còste
italiann-e e lìguri. Attacchi che ëan fæti söo che
con l'idea de sacchezzâ, ma che ëan giûstificæ e
inspiæ da sponcioin religioxi. I laddri de mâ Möi ëan
de popolaçioin ch'aivan abbrassou a religion islàmica
pròpio perché a l'ëa 'nna fê ch'a ghe lasciava
manifestâ i seu instinti da breganti. E o Coran o ghe
dixeiva: "Quande t'incontri de quelli che no
créddan, ammàssili con straggiâ do sangue e strenzi
ben ben e cadenn-e di prexonê". Pe ciù de
çinque sécoli mioin de crestiæn an passòu anni e anni
de patimenti, constreiti à cangiâ mainëa de vive,
caratteri e ascì e abitùdine econòmiche. L'è inte sto
momento chì che nasce i castelli, e töre de avvistamento pe-i barchi turchi, i paixi construïi in çimma a-i monti... Ò attrovòu ascì inte sti giorni chìe l'istöia do Santuäio da Madònna de Graçie de Söi, donde se conta un miäcoo passòu in te 'n attacco di Möi. L'ëa o primmo de luggio do 1584 e tutta a rivëa a l'ëa in allarme pe corpa de scorraie di Turchi. I paixi e i paisetti da còsta, patria de mainæ, se poeivan de lengê acciappâ da-o mâ. Quello giorno lì, tanto che a gëxa a sunnava e campann-e pe-a primma messa, un miggiâ de Möi, stæti chinæ da vintidoì galeoin, toccàvan a ciazza de Söi, derruàvan, ammassàvan e fävan a festa a-e dònne. A-a cappella da N.S. de Graçie gh'an xattòu via tutto: quaddri, mobilia, stàtue, e öi. Ma tòsto che i laddri son anæti torna in scî sò barchi, scibben ch'aivan o vento in poppa, i barchi no se mesciàvan. Se conta che un Möo, de fronte à sto fæto strannio o se segge sovvegnùo di crïi e di centi de dònne söeixi, tanto che portàvan via a Madònna Neigra d'inte quella gëxetta. L' è stæto allöa che da-a riva i söeixi an visto che tiàvan quarcösa zù da 'n barco; o l'ea o quaddro da Madònna! I barchi allöa an comensòu à mesciâse e à piggiâ o largo, tanto che o mâ o portava cian cianin l'imàgine da Scignöa de Grassie verso o sò paise e a sò gëxa. Sto miäcoo chì o l'é contòu ascì inte crònache do tempo, inti Annali da Repùbbrica de Zena. O quaddro ancon òua o gh'à 'nna veneuia into veddro, ch'a s'ea fæta quande l'an cacciòu in mâ. Quello ch'o lascia sensa pòule, o l'è che tutte e vòtte che quarchedun o çerca à cangiâghe o veddro, sto chì o se scciappa torna into mæximo ponto, comme se a Madònna a voesse arregordâ quello desgaibo che i Turchi aivan fæto a-i söeixi e a-o paise de Söi. Sti meixi che ven, veddiemo de pubbricâ tutta l'istöia do Santuäio de Söi. |