Bollezzumme!
|
Semmo à quarche settemann-a da-i previsti giorni cädi do G-8. Zena a l'è passâ ömai in sciâ bocca de tutti pe-e zà finn-a tròppo annonsiæ bæghe e proteste di çentri soçiali e de ätre assoçiaçioin che son contra sta magnâ de potenti, che veuan aveighe o drïto de deçidde a vitta do mondo. Ò zà avùo mòddo de criticâ in sciô Faro Lìgure a mainëa de comme o Scìndico de Zena Pericu o l'à tesciùo i rappòrti no solo co-i gruppi paxìfichi, ò che dìxan d'ësilo, che fan parte do Genoa Social Forum, ma ascì con quella brancâ de disadattæ soçiali, che se mésccian co-i manifestanti tutte e vòtte che gh'é a poscibilitæ de fâ do casin e di danni. Semmo arrivæ pròpio a-o cormo: an fæto finn-a de conferense stampa pe spiegâ pe fï e pe segno comme anâ à l'attacco di poliçiòtti. Ghe veddiëmo, se dòppo tutti i danni ch'avian fæto , î anian à ciappâ, de zà che î conóscian pe nomme e cognomme: me scappa da rïe à pensâ che gh'è di giùdiçi, pe no fâ di nommi o Papalia de Veronn-a, ch'o l'é appreuvo à çercâ tutte e mainëe de mette in galëa e Camixe Verde, assoçiaçion volontäia desarmâ, e nisciun no fa ninte contra da gente ch'a va in gïo a dî e cöse illegale ch'a veu fâ e ch'a faià, de zà che no l'é a primma vòtta che fan de ste sciollaie. O l'é un peccòu, perchè sta remenaia chì a fa passâ in segondo cian e raxoin de quelli che protesta. No l'é un caxo che dòppo che o goerno o l'à tiòu feua a propòsta de dialogâ co-i manifestanti, o Genoa Social Forum l'à dïto de scì, e in cangio i ätri di çentri soçiali an torna mandòu tutto a-o mittente. L'è donca chì che se vedde ben ben ciæo cöse l'é che veuan sti desandiæ politiçizzæ: lô se n'infocciäran da lòtta contra a globalizzaçion, quello che ghe premme l'è söo che fâ do casin, rompî di veddri de butteghe, inciastrâ de muäge, piccâ i poliçiòtti, solo pe 'nna raxon polìtica e ninte de ciù. A l'è a mæxima "coltùa" do Bertinotti e do Manu Chao, che no à cäxo se son de sprescia tiæ da parte da fâse càrego d'unna poscìbile mediaçion. E allöa quelle che son e giuste raxoin di contestatoî saian inciastræ da quelle leggere co-e tute gianche, finansiæ da di ambienti da Scinistra che veuan söo che creâ da confuxon, e vegnian coscì crovïe da-e sciamme de mòlotov, da-o fumme di lagrimògeni, da de imàgine che faian o gïo do mondo: 'nna brancâ de nesci co-i caschi e i bacchi che çèrcan à piccâ quarche sbïro, comme ô ciàmman loiätri. Sto G8 chì o saià coscì l'ùrtimo, de zà che da-o pròscimo i "grændi" da tæra se veddian pe vidioconferensa. E giuste proteste son contra a globalizzaçion e contra e deçixoin stæte piggiæ da pöchi e restreiti paixi, e de belle vòtte influensæ da-e grænde industrie mortinaçionale. Pe piggiâve un spegio de no guæi tempo fa e ch'o ne tocca da vexin, ammiæ a stöia da lezze votâ da-o parlamento éuropeo, da ciccolata ch'a se pêu fâ ascì sensa cacàvao; a l'é stæta emanâ pròpio pe aggiuttâ e grænde industrie. Con fâ de coscì, fan do mâ a-o produttô piccin ch'o travaggia in sciâ qualitæ, ma fan do mâ ascì à quelli paixi pövei ch'an into cacàvao unn-a de produçioin che fan intrâ un pittin de scùi into sò paise. Ê, scì che de cöse da dî contra a globalizzaçion ghe ne saieiva abbrettio, mæximo perchè finn'òua a globalizzaçion a l'à dæto söo che di problemi: basta ammiâ a BSE, ascì dïta scìndrome da vacca matta. Sta chì a l'é solo, ò a l'è fæta passâ, 'nna conseguensa de l'aviditæ de mortinaçionale che, pe aveighe ciù guägni e meno speise deuvian di métodi de allevamento conträi a-e lezze da natùa. A-i tempi de mæ messiäo, e vacche ê lasciàvan giâ in sciô pròu, ghe dàvan da mangiâ do fen, e fävan accobbiâ co-o töo, e a beusa a se deuviava comme grasciùa. A nòstra geneaçion, in cangio, a l'è vegnùa grande graçie a-e vacche serræ inte stalle, che ghe dan da mangiâ da fænn-a fæta co-e carcasce de ätre bestie, che végnan fecondæ da-o mëgo co-a sböra do töo inte 'nna sciringa, che fan ciù de sciuscianta litri de læte a-o giorno e co-i boccin che inte pöco tempo végnan grændi, ma co-a carne che dappeu d'aveila cheutta a se restrenze. Ma sti mæximi metodi d'allevamento se deuvian ascì pe-i pollastri, pe-i pesci, pe-i coniggi. Da ste cöse ven feua un sacco de domande: 1) Perchè s'é arrivòu a tanto ? 2) Perchè l'ommo o l'è anæto contra a natûa ? 3) Perchè i verdi, ò ambientalisti comme ghe dìxan, se son piggiæ a breiga de serrâ a caccia, de sterilizzâ i gatti, ma no son mai anæti à vedde inte che condiçioin viveiva e vacche ò e bestie de allevamento? 4) Perchè a BSE a s'é formâ inte l'Éuròpa e no, pe fâ un exempio, inte l'Östralia? Donca bisà dî che e caxoin de sti danni fæti da-e mortinazionale no son solo da çercase into guägno, ma ascì inte l'acceleraçion de l'evoluçion de l'òmmo. E allöa, segondo o mæ sencio e personale pæi, a respòsta à ste quattro domande a l'é unn-a sola: perchè a-o fenòmeno da globalizzaçion econòmica se gh'é accobbiòu o fenòmeno do mondialìximo e da grande quantitæ de gente che vivan, e de quelli che sta pe anâ à vive, inti stati tecnologicamente avansæ. I antiG-8 veuan da-i potenti ciù mëgio condiçioin de vitta pe-i òmmi do terso mondo, veuan che quelle gente pòssan stramuâ inti paixi ciù avansæ sensa tegnî da conto de 'nna cösa fondamentale: se inte 'nna tæra a presensa de l'òmmo a passa quelli che l'é i lìmiti de produçion de alimenti de quella mæxima tæra, l'é ciæo che beseugna anâ contra a-a natùa pe poei dâ da mangiâ à tutti e coscì s'é eubbrigæ à deuviâ e cortivaçioin in særa, i mangiæ transgénichi e fænn-e di animæ pe fâ cresce vacche,pollastri e coniggi ciù fïto che se peu. Finn'òua nisciun, nì i G-8 e nì i antiG-8, no l'à fæto presente sto problema chì: a neçescitæ de dâ di inçentivi pe limitâ a presensa di òmmi inte scìngole regioin da tæra. Pe fâ questo, l'è neçessäio investî de græn palanche inti paixi pövei pe poei dâghe, à cà seu, a poscibilitæ de fâse 'nna vitta dignitosa e lìbea, e no portâli clandestin inti paixi oçidentali pe poeine fâ i neuvi scciavi do duemilla a-o servixo de pöchi ricchi, boin solo da sfrutâ i òmmi. Bastieiva ammiâ inta Neuva Zelanda ò inte l'Östralia donde a tæra a dà de ciû de quello che a gente a peu deuviâ e donde coscì no gh'é de beseugno de anâ contra a natùa. Pe poei vive sensa mangiæ transgénichi, sensa fænn-e animæ e sensa cortivaçioin e allevamenti intenscivi bisà ammiâ donde, comme e inte quante gente se peu vive inte 'n tòcco de tæra, pe poei coscì vive tutti e ben. Ma son segùo che da sto G-8 no sciortià ninte de bon, comme ninte de bon l'è sciortio tutte e ätre vòtte... |