Bollezzumme!
Lettiatùa da giornâ d'ancheu
 
 
 
O galletto do Rumenta
(Fiorenzo Toso)
       I cöi ciù belli do paise cresceivan
into scito do Gioan o Rumenta, tra i Ciæn e a giæa do rian. 
   O Gioan o Rumenta o l'ëa un òmmo sccetto, sosso, mängraiòu, de longo imbrægo, e donca de longo contento. 
   O scampava à vende i sò cöi 'n sciô mercòu, a-a zeuggia, e quello ch'o guägnava o se l'anava à beive inte l'ostaia do Drinòlla.
   A casa do Rumenta a l'ëa unna baracca de töe, co-o teito de papê catranòu. I vestî do Rumenta, à memöia d'òmmo, ëan de longo stæti i mæximi, un pâ de braghe de chissà che cô, 'na camixa pinn-a de pesse, unna maggia de lann-a quande fäva freido. O l'aiva ascì de scarpe, ma l'ëa ciù fàçile véddilo descäso giâ pe-i caroggi ò pe-a mænn-a co-o sò cavagno, à çercâ inta rumenta di ätri quello che pe lê o poeiva ancon servî: un pægua guasto, unna scàtoa de cartonetto, de scòrse ò do pan secco pe-e sò gallinn-e.
    Scì, perchè o Rumenta o viveiva insemme à doe gallinn-e, unn-a gianca e unn-a rossa, bestie pinn-e de gaibo, che ghe dormìvan in sciâ testëa do letto e che bruttàvan de longo into mæximo pòsto. Tutte e mattin, e gallinn-e do Gioan ghe fävan l'euvo, e lê o l'ëa bello contento: con doe euve a-o giorno, quarche avanso trovòu pe-a stradda e dötræ feugge de cöo se peu vive da scignöi, ben che tutti no séggimo da mæxima opinion.
    E gente do paise ô tegnìvan a-a distante, se peu ben capî, ma o Rumenta o no se n'aiva de pe-a mâ. In fondo, o l'aiva de longo çercòu de stâsene in santa paxe pe conto sò, sensa dâ breiga à nisciun, e o l'ëa contento che nisciun ghe desse breiga: e dònne de casa ghe cattàvan i cöi tutte e zeugge, azzonzendoghene finn-a quarche scùo de ciù: "Tegnî, bell'òmmo, accattæveghe un panetto", savendo ben che ëan dinæ ch'anàvan à fornî drïto drïto inte stacche do Drinòlla.
     Chi no poeiva vedde davvei o Rumenta ëan i inquilin do neuvo quartê, Residenza Paradiso, sccioïo tutto sciù pe-a collinn-a di Ciæn in öcaxon de l'ùrtima specolaçion
ediliçia.L'architetto ch'o l'aiva disegnòu o Paradiso o l'aiva a mania di cubbi: tutte e case do Paradiso ëan di cubbi de ciumento, ammuggiæ un in sce l'ätro in sce 'n terren ch'o l'ëa stæto unna pinæa primma de l'ùrtimo inçendio doloso. L'idea, segondo se lëze int'un depliant de reclammo, a l'ëa quella de creâ un tìpico ambiente "mediterraneo", into quæ tìpico ambiente ti veddeivi - e ti veddi ancon òua - giâ de gente strafaläie, lardose, gianche comme o læte, vestïe co-a tuta reusa de Missoni e de longo co-a racchetta da tënis de pe-e moæn.
     Guardie privæ con tanto de can lovo proibìscian a-e gente normale de intrâ into Paradiso, à guastâ co-a sò spussa a vacansa di scignöi.
     O scito do Gioan o Rumenta o l'ëa pròpio de sotta o Paradiso, vixon orrenda pe-i òspiti, che pròpio no poeivan comportâ quella baracca e quello tòcco de tæra mëzo à cöi e mëzo pin de ciaraffi.
     Ma gh'è de l'ätro. O seunno segretto de tutti i inquilin do Paradiso o l'ëa quello d'avei un parchezzo sotta casa. Oh, scì, ciaschedun de lô o gh'aiva - e o gh'à - a sò remissa, "...ma vuoi mettere la comodità di avere un posto-auto là sotto, senza doversi arrampicare tutte le volte con la macchina su per il Paradiso...(pe chi va à pê gh'è un ascensô)...E nel garage ci sarebbe posto per il windsurf e la moto del Pierluigi, e per le feste che organizza la Denise, quando invita gli amici..."
     L'avvocato Bernardis, amministratô ùnico do Paradiso,unna vòtta o l'à finn-a provòu à parlâne co-o Rumenta. A-a propòsta de véndighe o scito, ciù un pò o vegetto o no ô scöre.
     Allöa l'è comensòu e lettie a-o "Gazzettino de XYZ", o giornaletto locale, lettie co-e quæ i ospiti se lamentàvan di odoî grammi che montàvan sciù de da-o scito do Rumenta, de sò gallinn-e che à vòtte anàvan à giandonâ sciù pe-o Paradiso e metteivan poïa a-i figgeu, do Rumenta che, de longo imbrægo, o spuava pe-a tæra quand'o veddeiva passâ l'avvocato Bernardis, tanto unna brava personn-a...
     Ninte da fâ. E o Rumenta, tutt'assemme, o vegne finn-a scimpàtico a-e gente do paise. Chi ghe regalava un vestî vegio, chi ghe dava quarcösa da mangiâ, chi ô conviava à beive...
     Unna seia, vegnindo à casa, o Rumenta o s'attreuva e gallinn-e co-o còllo tiòu. A seia dòppo, a màcchina de l'avvocato Bernardis, stæta lasciâ pe caxo feua do Paradiso, a vegne attrovâ sensa reue: l'ëa scciuppòu 'nna guæra.
     Quarchedun do paise, intanto, o regalla ätre doe gallinn-e a-o Rumenta. Ma o pëzo o doveiva ancon vegnî. A-a festa de San Giaxo, o Rumenta o tïa sciù un nùmeo a-o semenäio, e o te me va à vinse un galletto.

     Tutte e mattin, çinque menuti avanti che spæghesse o sô, o galletto o cantava, co-a sò voxe astronnâ, da rompî i veddri de tutte e case di contorni.
     I graditi ospiti, tutto meno che amanti de ste cantæle bucòliche, no ne poeivan de ciù. Ma comme, vegnî in rivëa à pösâse da-o stress de Turin e de Milan, à respiâ l'äia de mâ, à piggiâ o sô, e doveise addesciâ into cheu da neutte appreuvo à quello tron de'n galletto e à quello çiöto mäducòu do sò propietäio?
     Ätre lettie in sciô "Gazzettino", ätre refæte a-i cantonê. E intanto, tutte e mattin che o Segnô o mandava, o galletto o continuava i sò braggi solitäi, con gran contento do Rumenta e de meitæ paise.
     L'avvocato Bernardis, no se sa comme. o s'ëa a-a dreittùa incallòu à domandâghe de véndigheo. Mai ciù a-o mondo! O Rumenta, ansi, o l'ëa de l'idea d'accattâsene un ätro. Beseugnava fâ quarcösa, e fïto, e o Bernardis o no saveiva donde sbatte a testa. In sciâ fin, quarchedun di sò coinquilin o l'à avùo unn'idea.
     Chi l'è, into paise, che veu tanto ben a-i graditi ospiti, mai tanto ben da voei fâ tutto pe-o sò ben?
     Nisciun!
     E na, no l'è vëa, quarchedun o gh'è. I "operatori economici" o "turistici" che séggian, ghe veuan un ben de l'ànima a-i graditi ospiti. Ghe veuan ben à lô, e ancon de ciù a-e sò palanche. I "operatori" vìvan tutte e stæ co-a poïa che i graditi ospiti no gh'àggian ciù coæ de vegnî à XYZ, che a mòdda a tïe de ciù verso a Romagna, che i "operatori" de quarche paise vexin treuvan de neuve idee pe demoâ i graditi ospiti e fâli corrî à çentanæa, à miggiæa, int'unn'ätra staçion balneare.
     Dïto, fæto. Unna seia, l'avvocato Bernardis o chinn-a da-o sò cubbo, o ciù erto do Paradiso, e o va à rende vìxita a-o sò amigo Fumagalli, patron d'unna caratterìstica boutique inti caroggi do paise vegio e prescidente de l'Associazione operatori turistici di XYZ. O ghe parla bello ciæo: tanti inquilin do Paradiso son zà appreuvo à vende. Ghe n'è di ätri che ghe stan pensando. Se no se veu che i cubbi séggian veui into gïo de'n anno - co-e conseguense che se peu imaginâ pe-e stacche di "operatori" - beseugna fâ quarcösa, e avviòu.
     O Fumagalli, ammïa un pittin, o l'è ben d'accòrdio. Mancomâ, semmo sott'a-e eleçioin, e st'anno o scìndico o no l'è guæi segùo d'ëse elezzùo torna. O l'à di provvedimenti giudiçiäi in sciâ schenn-a. S'è descoverto che çerte liçense ediliçie ch'o l'à dæto de lengê inti anni passæ no son guæi regolare. S'o veu ëse elezzùo torna, o l'à beseugno de l'aggiutto de tutti i amixi e amixi di amixi, e sorvetutto di "operatori", che son quelli che in sciâ carega ghe l'an zà misso l'ätra vòtta.
     L'indoman mattin o nòstro scìndico o reçeive a vìxita do Fumagalli. Doe pòule. Dïto, fæto, effiçensa lombarda. L'offiçio de l'igiene do Comun o manda quarchedun à casa do Rumenta. Se descreuve, pe-a primma vòtta inte tanti anni, che quella baracca "è in condizioni igieniche disastrose", e ch'a l'è a-o de feua de tutti i critëi de l'abitabilitæ.
     O Gioan o Rumenta, quande ghe ghe dìxan ch'o se n'à d'anâ, o se mette à fâ o matto. O picca un cantonê. "Viene constatato l'evidente stato confusionale del predetto Damele Giovanni", ch'o vegne internòu, pe motivi de precauçion, inte l'ospiâ ciù vexin.
     Quarche giorno appreuvo, o l'è bello mòrto. A mæxima seia, l'avvocato Bernardis e o sciô Fumagalli çénn-an insemme, à carne de galletto.
     De lì à quarche meise, into scito donde ghe cresceiva i ciù belli cöi do paise, a dïta Residenza Paradiso SpA a l'incomensa i travaggi pe-o neuvo parchezzo. Gh'è chi dixe che a liçensa ediliçia a no segge regolare, ma a l'è pægia. O nòstro scìndico o l'à vinto torna e eleçioin.
     I cöi ciù belli do paise cresceivan into scito do Gioan o Rumenta.

 
Töa do contegnùo