I fràveghi an tempestòu
de gemme a croxe.
Scibben a-o scùo a riluxe
a no dà paxe.

Perso emmo a stradda
di grilli e de ciæbelle
e no ne resta 
ciù o tempo pe çercâla.

*****

Giornâ

L'ëa ancon tutto seren solo 'nn'öa fa
e se poeiva corrî in gallisòppa,
zugâ a-o pampan, scorrîse e acciappâse
sensa temma de cazze e fâse mâ.

Òua s'é fæto scùo e zà incomensa
à tremmâ quarche lumme drento a-e case.
Diventa curto o passo e meno netto
quello che dimmo e quello che sentimmo.

Finïo finalmente o strangoggion
s'ascordiëmo di cruçi da giornâ;
se levià a lebecciadda co-a spassoïa
ch'a passa dappertutto e a caccia via
vege magagne e e cöse stòrte e drïte.
O resto no saian che messe dïte.

[A primma de ste doe poexìe a l'à guägno o 2° pòsto a-o 36° Concorso de Poexìa in Lìgure "Lauro d'Oro", bandïo da-o Cìrcolo Mario Cappello pe l'anno 2001 (N.d.R.)]