Bollezzumme!
| Son un operäio
metalmeccànico, travaggio pe-o Riva, e l'é tòsto çinqu'anni
che passo meitæ da mæ giornâ in minëa. Eh, zà,
perché no ô san miga tutti che o ciclo à cädo
d'unna fàbbrica de l'äsâ o l'é söo che un
scæn ciù in sciù che a minëa! Niätri o mateiale
no ô tiemmo feua d'inta tæra, no, ma ô travaggemmo...
che stagghe pëzo de niätri gh'è söo che i minatoî.
Fòscia, avanti che finisce l'anno, saviëmo a fin ch'o faià
o forno de Corniggen. N'é servïo à ninte manco
l'accòrdio de programma, che o Scindacato e a Scinistra gh'an
fæto tanti descorsci, e che into gïo de neuve meixi o doveiva
fâ serrâ o forno; stæto firmòu quell'accòrdio
lì, o Scindacato e i partïi da Scinistra an criòu vittöia,
perché i pòsti de travaggio ëan sarvi. A-i vintineuve
d'agosto l'é scæito i neuve meixi, ma o forno o continua e
o continuià de longo à mangiâ carbon, pellets e mineali
e à spuâ quella ghisa ch'a fa vegnî ricco o patron.
Òua o Biasotti, nemigo do Riva e che o Scindacato o ne ô presenta
comme un nemigo de chi travaggia, o l'é vegnùo inta fàbbrica
à dîne, megio che un scindacalista, che un accòrdio
pezo che quello o no se poeiva fâ. Un accòrdio ch'o l'asseguava
tutti i avvantaggi a-o Riva e nisciun pòsto de travaggio a-i operäi,
un accòrdio firmòu ma che òua o no vâ un belìscimo,
o l'é söo che do papê che o Riva o se ghe porreiva ascì
nettezzâ o panê, à despëto do Mori, da Vincenzi,
e de Sansa-Pericu. A sciâ Vincenzi, in cangio, a n'é vegnùa
à dî che belli guägni che ghe faià l'ambiente
e o travaggio, co-o forno eléttrico. Se, segondo lê, travaggiâ
inte'n forno eléttrico, cointâ à bruxâse de brutto,
à vegnî sordi e à ciappâse un de quelli mâ,
respiâ da pùa e do fumme, che s'ammùggian inte quella
scàtoa ermética (saià pe quello che l'ambiente o se
n'avvantaggia, a pùa a finisce tutta inti pormoin di operäi);
se, segondo lê, sta chì a l'é qualitæ do travaggio,
ch'a ghe vegne lê, ò quarche sò portaborse, à
moî là drento! A qualitæ do travaggio, cäa sciâ
Vincenzi, a comensa, avanti de tutto, con respettâ a dignitæ
de chi travaggia, e inte fàbbriche do Riva a dignitæ e i drïti
di operäi végnan de longo missi sotta i pê. Guäi
à chi reclamma i sò drïti, magara pe vie legale - se
s'é constreiti - visto che o Riva o se permette finn-a de levâ
i premmi produçion e de resultato d'in sciô saläio de
quelli che s'en incallæ à méttighe di sappelli, magara
solo perché gh'an a corpa de voei quello che ghe pertocca. Intanto,
là drento se ghe meue: l'ùrtimo d'unna longa lista o l'é
stæto un zoeno de trent'anni, furminòu da-a scàrega
eléttrica d'unna màcchina pe assardâ, ma semmo segùi
che, in sciâ fin, ghe daian tutta a corpa à lê, de n'ëse
stæto raxonòu à basta... Dappeu de neuve meixi da l'accòrdio
de programma, gh'é ben ben de zoeni co-o contræto à
tempo, che l'an lasciæ à cà, a-a faccia da vittöia
scindacale, e di belli ätri î compagnian a-a sciortïa,
con dîghe "graçie pe-a conlaboaçion". Dappeu de neuve
meixi, o Riva o n'à ancon presentòu, pe fâ o forno
eléttrico, un piano industriale ch'o segge compïo e ch'o vagghe
ben. Dappeu de neuve meixi da quell'accòrdio vittoioso, i operäi
no san ancon a fin che faian. No ghe veu guæi à capî
che o Riva o gh'à avùo, e o gh'à ancon òua,
di arrembi polìtichi de conto, co-a compiaxensa di scindacati; do
resto, dappeu d'aveighe regallòu a sciderurgia italiann-a (ghe l'an
vendùa pe doamïaçinqueçento miliardi e a ne vâ
quarantamïa: ciù do novanta via çento de rebascio),
òua con st'accòrdio chì gh'an dæto un tòcco
de çittæ pe doe palanche, millequattroçento franchi
à metro quaddro, ch'o ne peu fâ tutto quello che ghe gïa.
Ma o Riva, despiaxe à dîlo, o fa tutto quello ch'o veu ascì
perché o gh'à l'arrembo da trìplixe scindacale. Se
fa sciòpero quand'o ô veu Lê (e son di sciòperi
pagæ: a-a dreitùa fan de prescioin in scî cappi reparto,
tanto che fàssan scioperâ finn-a i contræti de formaçion-travaggio),
se va in ciassa à manifestâ quande ghe cimbra à Lê,
magara se tïa finn-a di scarpoin à chi o veu Lê. Ricatto
a l'é a pòula giusta, segùo: beseugna lottâ
insemme a-o Riva, perché niätri ne interessa o pòsto
de travaggio, ma in realtæ a-a fin da föa son segùo che
ç'accorziëmo ch'emmo lottòu söo che pe-i seu interesci
e arrestiëmo co'unna magnâ de mosche, comme sempre. Intanto,
inta fàbbrica se meue, in còrpo e ànima: quattroçento
personn-e so'anæte in penscion e se manda a-o sbaraggio di zoeni
sensa espeiensa e no guæi ammeistræ. Un figgeu ch'o l'é
intròu da pöchi meixi o m'à confiòu che o primmo
giorno in fàbbrica, à lê e a-i ätri neuvi assonti,
gh'an dïto: Fæ ciù fïto che poei, à imprende,
perché i vegi no ghe son ciù e beseugna che fæ viätri
quello che fävan lô. Pìggian di neuvi operäi
da-e liste de mobilitæ, perchè se profïtan ch'an beseugno
de travaggiâ e î assùmman à tempo, con di livelli
basci e, donca, paghe à l'öa ciù basse. E dévan
mantegnî moggê e figgi co'un mïon e mëzo a-o meise!
De vòtte, se giamminn-a à vedde e à vive de personn-a che vitta e che lòu da cæn che son sti chì. De feua se descöre, se firma di accòrdi, se fa di programmi e di piani industriali, s'asgrëa di sciummi de pòule... e là drento se ghe meue. P.S. St'artìcolo chì o l'é stæto scrïto avanti i vintineuve d'agosto: comme çe figuämo, l'ærtoforno o continua à marciâ à ciù no dî, ma intanto l'é cangiòu ben ben de cöse. Tanto pe comensâ, s'é sacciùo che a valutaçion de impatto ambientale do piano industriale do Riva a no ghe tocca ciù a-o Ministëio de l'Ambiente, ma a-a Region Liguia. E a-i vintineuve d'agosto o ministro "Tex" Willer Bordon, stæto sponciòu ciù che ätro da-i Verdi e da-o compagno verde Mattioli, o l'à dæto un urtimato a-o Riva. Avanti i sette de settembre o dovià presentâ un piano industriale e a region a dovià valutâlo. Into comunicòu no se parla che fin faià i operäi. O contrattacco do Riva o no s'é fæto aspëtâ: E mi mando tutti à spassio. A-i trenta d'agosto emmo fæto sciòpero (ammiæ un pittin, pròpio comme ò dïto avanti, anche stavòtta quelli do personale an sponciòu i cappi reparto e i ascistenti à fâ anâ in stradda i contræti formaçion-travaggio, e into vegnî in derrê da-o sciòpero s'é sacciùo che inte tanti reparti no an timbròu o cartellin in sciortïa, perché "fòscia o Riva o ne paga a giornâ"). Savei ste cöse chì, che semmo strumentalizzæ pe-i interesci do patron, a l'é unna cösa ch'a fa mâ a-a dignitæ e à l'orgheuggio d'ëse operäio: sfrutæ in sciô travaggio e in sciô sciòpero. Scibben che e mæ idee polìtiche en de ätre, ò lezzùo con piaxei o primmo de settembre un volantin da scinistra estremma, che ô dàvan feua da-o stabilimento, donde dïvan pöcoassæ e mæxime cöse ch'ò scrïto mi de d'äto (A l'é l'ùnica voxe, insemme a-a FAILM, ch'a contraste e fäscitæ che FIM FIOM UILM vorrieivan dâne da beive unn'ätra vòtta!). Pe fâve accapî, o volantin o contegniva ciù nì meno st'idea chì: "defende l'açienda no veu dî defende i operäi". E à defende l'açienda òua gh'é, ciù che mai, a trìplixe scindacale. O sciòpero di trenta d'agosto - comme tutti i sciòperi, à dâ mente a-o scindacato - o l'é finïo co'unna vittöia: à sentîli liätri, tutti i sciòperi finìscian con de vittöie, ma - chi ô sa comme mai - dòppo un pittin semmo torna in ciassa à scioperâ. No vorriæ che e nòstre foïsan e avvoxæ "vittöie de Pirro"! (2 settembre 2000) |