Te stongo sempe attuorno e nun te coglio,
pecchè tu sì ‘nu sciore ca se ‘nzerra.
Io stò ‘n trincea, cumbatto chesta guerra;
stò sempe ‘e guardia; aggia passà stu scoglio!
Finchè nun pozzo fa’ chello ca voglio,
sta’ sempe ‘nzieme a ttè pe cielo e terra,
aspetto ‘o segno ca ll’attacco sferra
e ca stù nureco d’ ‘o core scioglio.
Chi sa pecchè cù ttanta core attuorno
sultanto ‘o core tuoio mme piglia ‘o core,
sulo cù tte pare ca schiara juorno.
Voglio ca pure tu mme chiamme ammore.
T’ ‘o ddico, gioia mia cca, senza scuorno,
nun faccio ca penzarte a tutte ll’ore.