Mme pare ca giranno pe’ Milano
nun stongo cchiù in Italia ma nun sacce
int’a quale Paese. Veco facce
d’ogni culore e nazionalità.
Siccome stammo ‘n tiempo d’elezione
nce stanno ‘ncoppa ‘o muro ‘e manifeste,
è quase Pasca, ‘a capa già int’’e ffeste,
leggo che scrive nu partito ‘e ccà:
“Proteggi il tuo futuro, i clandestini
vadano fuori, vota per
però chistu cartiello nun te spiega
tutta sta ggente che nce vene a ffà.
Nun dice ca int’’o munno ‘a famme e ‘a guerra
se legge dint’all’uocchie d’’e ccriature,
ca sulo p’’a speranza ‘e sta’ sicure
nce sta chi parte e sonna d’arrivà,
doppo nu viaggio ch’è ‘na sfida a’ morte,
dint’a ‘na terra libbera e ffelice.
Vo’ faticà, se vo’ truvà ll’amice,
‘na vita dignitosa vo’ campà.
Ccà invece se cultiva ll’egoismo,
se penza “stu straniero che mme leva?”,
cchiù nce se penza e cchiù nce saglie ‘a freve,
chesta è ll’idea ca nce fa raffredda’.
Sta società vede sulo ‘e denare,
conta ‘a ricchezza, o prezzo d’’o ppetrolio,
quanto nce costa ‘o pieno c’’o ggasolio,
nun serve a nniente ‘o ppoco ‘e umanità.
Si nce rifliette tutte ‘e carburante
S’appicciano e te donano calore,
ma ponn’addiventa’ fonte ‘e dulore,
‘o ffuoco po’ distruggere ‘a città;
mentre ‘o calore umano nun fa danne,
te fa passa’ ‘e jurnate sempe allero,
nun move nu mutore, chesto è overo,
però che bella ‘a solidarietà.
Perciò nun maltrattammo sti pperzone,
cercammo ‘a strada pe’ campà cuntente.
Ncopp’ a sta terra pure ‘e sentimente
te scarfano, ma senza t’abbruscià.