Quann’è ca dice a mme “te voglio bbene”? Quanno mme chiamme ammore pure tu? Quanno mm’’e llevo a pietto chesti ppene e st’oppressione nun ‘a sento cchiù?
Si tu mme scrive sento dint’’e vvene ca ‘o sango vola verzo ‘o cielo bblù e dinto ‘a capa veco certe scene ca io so cumparza e ‘a primm’attrice tu.
Ma comme he fatto a farme vulà ‘a mente fino a tal punto ca mme manca ‘o sciato e a farme nnammurà perdutamente
comme ‘a nu criaturiello ‘ncapricciato? Ormai manco ‘o pumpiere cchiù potente mme po’ stutà stu ffuoco c’he appicciato.