Comme te chiamme nun me l’he mai ditto,
‘E te tengo ‘na lettera sultanto;
guardanno chella lettera me ‘ncanto
e penzo sulo sulo, zitto zitto
“qual’è ‘stu nomme ch’essa nun ha scritto?
E’ ‘a lettera d’’e rrose, ma qua’ santo
è ‘o santo ‘e chi mme porta ‘o core ô schianto
doppo ca mme l’ha chiuso int’’o cunvitto?”
Fantastico penzanno a tutte ‘e nomme
Renata, Robertina, Rosa... quale?
Cerco ‘e truvà ‘o sistema, cerco comme
pozzo scuprì ‘o segreto. Ma è normale?
Aggio truvato! Aggio tirato ‘e somme!
te chiammo sulo AMMORE e nun è male