CAMPAGNA INT’’A STAGIONE

Tu sì fresca dint’’e frasche
Cu’ ll’addore d’’e llimone,
Braccia ‘a fora e veste lasche,
sì ll’emblema d’’a stagione

quanno tutte ‘e sciure gialle
stanno apierte p’’a calura,
quanno ‘a sera cante e abballe
mmiezo ‘o vverde int’’a friscura.

Comme è bella chesta terra,
siente arille, guarde ‘o melo,
fore ‘o munno è chino ‘e guerra,
cattiveria, neve, gelo;

mentre ccà tu abballe e io guardo,
mmiezo a ggrano e sciure fine,
‘e bbraccelle, ‘e ll’uocchie ‘o sguardo
e ddoje labbra curalline.