Ol viàl di müre

Ol Viàl di müre

A so turnàt amò söl viàl di müre
a gòdèm la belèssa di bastiù,
e 'l cipetà, dè töte chi creatüre,
chi ronza 'n mès ai ram dè stè piantù,
compàgn dè quando, büligae 'n di pagn,
e primaéra la gh'ia ü nòm: vint'agn.

Ma chi gràte dè fiur éle crodàde ?
chi fòie isse mai vérde, gh'éle piö ?
Chi banchine dè lègn martorisade,
in chè manéra i à strèpàde sö ?
Anche dè chi piàntù nè manca ü sfràch:
chèste noèle, i ma salüda gnach.
Come l'è töt cambiàt, a l'è piö chèl
che o conossit a fan dè sèt e mès,
che per trent'agn o regordàt gràn bèl....
Trent'agn ? gna mé, incö, a so piö li stèss.
Alura, l'avrès vést gnach a sircàl
i-sto tramont, in sima a chèsto vial.
.***.
(G. Battista Galizzi Ducato P.zza Pontida)