Ol Tèmporal

Tèmporal sens'aqua

Col vènt che bófa, i niole spantegade,
i sè cór dre, i sè sböta, i se scrapuna,
pò 's vèd ü sömelèch che za 'l la 'ntuna
dè fàle crodà zó, comè cascade.
S' comencia 'nfati a fölmegn e trunade,
e 'nfi l'è 'l cél iscür, che 'l mögia e 'l truna,
e s' sènt ü bruntulà che l'impresiuna,
come dèss föra i anime danade.
Fina la tèra 'l pàr chè la rimbombe,
ma passàt chèl momènt issé infernal,
quando 's crèdia che sè svödess a i tombe,

ol cél a l'isberlüs comè ü córal
e i léa 'l sò sgul, pacifiche, i colómbe,
per salüdà..... la fì del temporal.

.***.
(Luigi Gnecchi: Ducato P.zza Pontida)
(Trascrizione a cura di Dominoni Pietro)