Dopo troàt la porta,
'mbociàt la seradüra,
a 'l pènsa sö ìn d'ün àtimo
la scüsa piö sicüra,
per imbunì la fomna
se ìn caso l'è amò ìn pé.

"Madòi ghè dét ol ciàr !
Saràla zamò ìn nana ?
Opör co 'n mà öna sibra
saràla là ìn sotana ?
Poer mòrcc, me racomànde
Signur ardè 'mpo zò !"

L'à gnà tocàt la crica,
la fomna l'è ìn setù.
"Porco, sömiòt, baraba,
canaia e mascalsù,
l'è mèsanocc o ludro,
él l'ura d'vegn a cà ? "

"Sito, chè i s-cècc i dorma,
Te ghét rezù, l'è ü fal...
scalmànet miga inötèl,
Te 'l sé che 'l te fà mal...
Pò quarcèt zò...fenésela
öt ciapà sö 'l fregiur ?"

"Ma se tà sirchèt doma
ché gabbie dè s-ciopà,
Lassémla lé, stà certo
che m' se èderà 'ndomà;
e adèss caèt fò, e po mochela,
và in lècc o limbanù.

Cumuda bé chi braghe...
cumuda pò 'l giché
destèndel sö la scagna
insèma col gilé.
Segnèt ! almànch, o èrètec,
e... bagna miga zò.

"Arda che smorse...". "Fermèt,
che fò öna fömadina..."
"Alura dorme..."."Spèta,
cara la me Rösina !
Perchè fét la catìa ?
soi miga ol tò Tonì ?".

"Me par che té la 'ntunèt...
Crìbio Te ghé i pé frècc !,
tirèt dé la tò banda,
stà fèrmo 'm po 'n del lècc !
lassa dòrmì chì dorma !,
rompida dè coiò !".

"Édèt comè te fé ?
S'pöl fàt gna ü cómlimènt,
pàr fina che i mölzine
i 't fasse ü gràn spaènt...!"
"Ma Tone, 'ndèm ragiunela,
go otér dè pensà.

A pènse che 'l Bepìno
'l gà rot zamò i scarpìne
al Rico e ìl Giàcomì,
ghè và piö bé i braghìne
ràmpogn dè sà e dè là,
ma i mossa ol tamborlà.

La Esterì, la Càrola,
la Nina, e mé chi soi ?
Chèl sura 'l tegn piö i pónc,
chèl sota mè fal boi !.
E Te, a momèncc, per régola
te gh'ne gnà 'ndoss gna 'nfòss ".

"Arda ! la me Rösì,
in fì d'la sètimana
go giöst dè scöt ol còtimo:
l'è pròpe ol toca e sana,
te do la bösta 'ntréga
issé ghe pènse piö.

Per te öna bèla vèsta
con tàt dè fabalà
e ü pér dè calse rösa
sforade a töt andà...".
"Tone, e i scarpète zalde ?"
"Met dèt a chèle e sciao.

Vòi vèdèt semper bèla,
Rösa, Rüsì, Rösèta,
cara compàgn dè quando
ta sìet amò öna s-cèta
quando, mé bèla stréa
te me facc pèrd ol co.

S'regordèt che girade
söi Müre e 'n di stradèle ?
Tacàcc, strenzìcc,...s'regordèt ?
sèmper vardando i stèle ?
Söi pràcc dèl Conventì
t'o dacc ol prim basì...

Égnèl dóca, Rösina
ègnèl i-sto basì ?
Tirèt a pröf belèssa,
dàm ché 'l tò bèl bochì...".
"Mama, ol pissì..."."Ma copet !
Ghét pròpe oter momènt ?".

"Varda chi è sés: regordèt !"
"L'è inötèl pensà sö:
sì è sèt a l'è öna Mèrica,
ol tram me ìl paga piö..."
"Mama 'l pissì 'l và in nana"
"Égne, tormènt...So ché !".
.-.
(Autore, G.Mazza Trascr. Dominoni P.)