Gh'è nient de pussee bell

(duetto)

Lù

Gh'è nient de pussee bell podè cantà

romanz e canzonett che dent de mì

me resten lì ligaa coi desideri

che voeuren vess amis con la fortuna.

Lee

La musica e i paròll di tò canzon

me fann rinass l'ardor del grand amor

che inziga la passion con la dolcezza

di bei maner suttil d'ona carezza.

Me pias cantà fin quand

tra i rampicant del mè pogioeu

el sponta on fior de praa

domà per mì!

Assieme

L'è bell cantà, ballà e spassegià

sotta brascett d'on mond' che te sorid.

Se gh'è on dolz basin che a nun me scappa...

l'è on fior de ròsa senza spin,

ch'el mett in d'on canton del coeur

l'amor sincer che mai el moeur.

Lù

L'è tanto tanto bell con tì ballà.

pensand ai bei moment del temp indree,

de quand la Ginger Roger la ballava

coi moviment legger d'ona farfalla.

Lee

Me pias andà ballà in d'on night club

al ritmo d'on balett del Fred Astaire.

Cilinder col baston e fantasia...

l'è on magich boff de vent de simpatia!

Sui pass d'on bell balett

e i melodii di bei canzon,

te stendi sòtt i pee

i sògn d'amor!