Foeugh artificiai 

Serena nòtt romantica d'estaa.

On boff legger legger del vent de breva

el fà smorzà la lus di lusiroeul

desora d'ona scies con sòtta on grì,

amis di mandolin e di ghitar,

che per i stell ghe fann la serenada.

E i stell, de l'alt di sò pogioeu celest

ghe butten sora al grì i fior del ciel.

Tra on fior e on alter fior

che borlen giò perterra

davanti de la sces

se sent a l'improvis

on bòtt e on alter bòtt,

con vun anmò che riva,

ghe manden là in castigh

la serenada, al scur

in d'on canton.

Dal còll d'ona bottiglia de champagn,

i foeugh artificiai, al ciar de luna,

comincen fà sbilzà i ballonitt

desora d'on crespin de cent color.

E lù e lee, desòtta del crespin...

man in man, settaa sù la banchetta...

oeucc in di oeucc, sospir e giurament...

amor amor, per semper senza fin!

     On scampolin de temp,

     l'eterno per la vita,

     e l'anima dal coeur

     nissun je pò divid!

     Paròll gentil sincer,

     i stell de testimòni...

     lontan foeura del mond

     succed quell che succed...

     e bòna nòtt!