Fetta gialda de luna
Dedent d'on ballon de savon
sospes sù la cima del mond,
insèma con tanti basitt
che cerchen di laber dispòst
de comprà l'emulsion
che rinfòrza la smania d'amor...
mi de lor, stasera me sganci.
E salti in belezza
sù la fetta gialda lusenta
de luna che passa
sù la strada maestra del ciel.
Cont el ciar del fanal di lusnad
foo 'l turista aventizi special.
E quand troeuvi tra i stell el mantell
col magich capell a cilinder, me fermi.
Duu conili stremii,
dò ronden novell,
me ciappen per man
me porten giò in bass
sul palch d'on teater
per ben recità
tutt quell che mai pù
l'è lecit pensà.
Rivedi la luna che và
sui strad che gh'hann minga la fin.
Camina de corsa ghe foo:
Và subit de pressa sul pòst
del traguard de la nòtt.
Con fermezza gh'è 'l sô che l'intend
de fà splend el dì de bonora.
La cala la luna
dedree de la vòlta celesta,
la sara la pòrta...
e la spetta la nòtt del doman.
In de l'aria tengiuda de bloeu,
pitturada de giald col penell,
sòtt on vell la se ved in risalt
la luna che splend, volentera la guardi.
Ciao, fetta gialda de luna!
Te spetti doman...
su la strada celesta del ciel.