Festa
Varda varda
tutt in pressa la Samanta
con la Gina e la Rosetta
vann inséma sul mercaa
a comprà la ròba bòna
per doman che l’è la festa.
Festa granda del paes.
E in manigh de camisa,
gh’è ’l sacrista
che d’incant se mett sonà
i campann a la pù bella.
La in balera
gh’è ’l Tonino e l’Angioletto
con la muda quella noeuva
hinn lì pront giamò d’on pezz
per ballà prima de tutti
con la tosa, senz’ on dubi,
pusse bella del paes.
Gh’è la bionda, gh’è la mòra
che la pensa:
Senza on fall son mì de cert
de la festa la regina.
Nient che cambia,
ecco chì la pantomina:
’Na mazurca de campagna
mei anmò on rok and roll
o el ball de la mondina...
la me disa signorina
quell che lee ghe pias ballà.
La monfrina piemontesa
la se balla
ma però a la moderna,
anca chì in Lombardia.