El primm basin

 Musicata dal Maestro P. Bosetti

Stasera voeuri datt sòtta la luna

tutt quell che tanto dolz me ven dal coeur.

tutt quell che gh'è in de l'azur del ciel,

che vedi a l'orizzont senza confin.

Silenziosa l'è la nòtt in sù la spiaggia,

la giuga a te ghe l'hee l'onda del mar;

la sfiora con la s'ciuma i nòster pass,

e par che la sorid al mond inter.

I mè sògn coi speranz sodisfaa,

tucc d’incant sul mè coeur s'hinn fermaa.

Dal celest firmament tra i stell,

tì oh luna splendent guarda giò.

Va a cercamm, tutt per nun, on sitin

bell tranquill per podè sta visin.

Sul pòst che m'ha trovaa la bella luna,

te strengi in di mè brasc con tanto ardor.

I mè speranz diventen realtà,

el coeur el tacca anmò a sospirà.

Testimoni la voeur vess la luna pièna,

ma ona nivola la scond el sò splendor.

A l'ombra te faroo el me primm basin.

El primm basin... scintilla de l'amor!