Acqua passada

La giòia del moment che t'hoo incontrada

la passa pù tra i piegh de la mia vita.

L’è stòria d'on foeugh mòrt, acqua passada,

sul liber del destin, giamò l'è scritt.

Coi tò basitt gustos de dònna bella,

in del ciel, mì seri on rè in sù 'na stella.

Adess in mezz a on gran desert

me senti abandonaa,

quand mì, con tutt el coeur avert

rigòrdi el mè passaa.

De l'inocenza, on gran bell fior,

che mì, per nient content,

soo nò perchè, al giust moment,

col coeur l'hoo nò catada.

Acqua passada a l’è

sui roeud del mè molin

e che purtropp adess

mai pù la torna indree.

L'amor amar a l'è 'na pèna greva

che per fatalità se troeuva

ai vent di temporai de primavera.

E l'anima in del vent, la se rigira.

Me son trovaa in del gioeugh d'ona partida,

che malament per mì a l'è finida.