Dottor Faust
Musicata dal Maestro C. Merli
Al primm ciar de la mattina
el destin vigliacch fottuu
sul cuntee de la mia vita
ghe refila senza on fall
on dì de pù.
L'orelògg che gh'hoo in cà mia,
che col temp el cor el và,
l'ha mandaa in sù la malora
la ruffalda gioventù,
ma per debon.
Illustrissim dottor Faust!
Anca mì compagn de lù,
son chì prònt de barattà
tutt quell che gh'hoo de bell
col demoni e col destin
per viv anmò la gioventù
coi me vintann!
Dottor Faust! Che me scolta!
La beltà di certi dònn
fann rinass i desideri
che gh'avevi semper viv
de giovinott.
Pers el pel ma minga el vizi,
l'intenzion anmò la gh'è.
Ma selvadega la smania
l'è costretta col coo bass
a segnà el pass.