Come l'era bell

 Musicata dal Maestro C. Merli

E tuscòss el cambia con l'andà del temp.

La se trasforma la città,

i cà vegg diventen monument

che resten lì domà per rigordà

came l'era bell Milan

quand l'era anmò di milanes.

El savor del temp lontan

ormai sparii sòtta al talent

del progress in moviment,

se vòlta nanca indree

per ben vardà i magagn

giò perterra sù la veggia strada

che la cambia la soa direzion.

Col progress, che l'è nò quiett,

confus dent de stoo rebelòtt

semm content de podè vègh

almen di bei rigòrd.

El rigòrd de l'aria netta,

el profumm d'ona michetta

anmò calda, l'hann sfornada

dal prestin sù la contrada.

El progress d'allora l’era

el sbarlus di lampedin

dent de l'ombra de la sera,

per dispett di vegg lumin.

Ma la roeuda la tacca girà,

a ona velocità che fà impression

e i scopert se metten 'dree scappà

vers on traguard d'on altra dimension,

tutta fada sui misur

d'on mond smanios de novità.

Ma gh'è on moster subit pront,

faa de catramm e de cement,

tant el spera de sarà Milan

in d'ona gabbia, come 'na preson,

tutta insèma ai monument e ai cà,

domà per esaltà l'astrusità,

e per ben imbottiglià

quell che nun gh'emm anmò de bell.

'Sta gran smania del progress...

per nun a l'è regress!