Città che cambia

 Musicata dal Maestro S. Parisini

Là in del Vicol Calusca, in cantina,

biciclett e la scelpa del gir

l'è sparida pian pian in sordina.

De quell temp gh'è domà el sovenir.

Del Felice Tecoppa moderno,

el "night club" l'hann dervii tra i vecc cà.

E de nòtt, isolaa da l'esterno,

gh'è on salon con dò pist per ballà.

Romantica città coi tò baler,

ormai ti te see pù quella di ier.

T'hee trasformaa i tò strad e i vecc tramvai

t'hee faa sparì i brumista e i sò cavai.

Gh'è l'acqua del laghett senza on barcon

la fera la gh'è pù longh i bastion.

E t'hee mandaa in malora i personagg

che semper s'hinn capii col tò lenguagg.

A San Sir, per cambià la campagna,

sù l'Olona e i sò fòss secolar,

per adess t'hee faa sù 'na montagna,

forsi on dì t'hee faret anca el mar.

Ma del D'Anzi e del Bracchi in sordina,

tra i orchester de ball 'merican,

la risona i canzon l'orchestrina

che la ruga i rigord de Milan.